Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 350 Hüküm no: 447 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Kostanti’nin Ahmed Çelebi Vakfı’ndan borç aldığı (bey‘ bi’l-vefa) Ma‘rûz Medîne-i Üsküdar’da vâki‘ merhûm Ahmed Çelebi vakfının hâlâ mütevellîsi fahrü’l-eşbâh Üsküdar Ustası el-Hâc Ali Ağa b. Mehmed Ağa medîne-i mezbûrede mahfil-i bâbda meclis-i şer‘-i hatîrde Yanaki v. Kostanti zimmî muvâcehesinde merkūm Yanaki zimmî mâl-ı vakf-ı mezbûrdan olmak üzere yedimden istidâne ve kabz ve umûruna sarfla istihlâk eylediği cihet-i karzdan altı yüz guruş deyni mukābelesinde merhûm sadr-ı esbak es-Seyyid Mehmed Paşa vakfı musakkafâtından medîne-i mezbûrede Yenimahalle’de vâki‘ ber-mûceb-i temessük ma‘lûmü’l-hudûd bir bâb vakıf menzilini deyn-i mezkûr mukābelesinde bâ-ma‘rifet-i mütevellî bana vefâen ferâğ etmekle menzil-i mezkûru ba‘de’t-tahliye ve’t-takābuz merkūm Yanaki zimmîye beher şehr yedişer buçuk guruşa îcâr ve teslîm eylediğimde ol dahi ba‘de’l-istîcâr ve’t-tesellüm ve’l-kabûl menzil-i mezkûru rehniyetden ba‘de’l-fekk asıl mâl-ı vakf-ı mezkûr altı yüz guruş ile menzil-i mezkûrun ücretinden bâkī elli iki buçuk guruş ki cem‘an altı yüz elli iki buçuk guruşu bi’t-tevliye taleb ederim deyü da‘vâ ol dahi cevâbında ber-vech-i muharrer ikrâr ü i‘tirâf edip mûcebiyle menzil-i mezkûru fek ve meblağ-ı mecmû‘-ı merkūm altı yüz elli iki buçuk guruşu taraf-ı vakf için mütevellî-i mezbûr Ali Ağa’ya edâsıyla merkūm Yanaki zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 2 min-R sene 1205