Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 353 Hüküm no: 454 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın sattığı bağındaki taşlarına el koyup ot yığınlarını yaktığı iddiasıyla Kuyumcu Maroke’ye açtığı tazminat davasında sulh olduğu Ma‘rûz Mahmiye-i İslâmbol’da Hocapaşa mahallesi sükkânından sâhib-i arzuhâl Abdullah Ağa b. Ebûbekir nâm kimesne medîne-i Üsküdar’da mahfil-i bâbda meclis-i şer‘-i hatîrde arzuhâlde ismi mezkûr Kuyumcu Maroke v. Avadik nâm zimmî muvâcehesinde medîne-i mezbûrede Akyapı nâm mahâlde vâki‘ Aşcıbaşı bağı demekle meşhûr lede’l-ahâli ve’l-cîrân ma‘lûmü’l-hudûd bir kıt‘a kürûmu mülk bağ yedimde mülküm iken bağ-ı mezkûru târih-i kitâbdan dört buçuk ay mukaddem semen-i ma‘lûm ve makbûza ve bâ-hüccet-i şer‘iye merkūm Maroke zimmîye bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl etmiş idi lâkin bağ-ı mezkûr derûnunda bir taş âbdest musluğu ve bir mikdâr duvardan muhrec taş ile beher arabası onar guruş kıymetli on araba iki yığın ot yedimde mülküm olup âhar mahalle nakl murâd eylediğimde teslîmden imtinâ‘ eylediğinden mâ‘adâ zikr olunan otu ihrâk bi’n-nâr etmekle kıymeti olan cem‘an yüz guruş ile zikr olunan taşları taleb ederim deyü da‘vâ ve merkūm Maroke zimmî cevâbında müdde‘î-i mezbûrun müdde‘âsı olan taş ve otu bağ-ı mezkûr ile ma‘an bey‘ etmiş idi deyü def‘e tasaddî ve beynlerinde münâza‘ât-ı kesîre vâkı‘a olmuş idi el-hâletü hâzihî beynlerine muslihûn tavassut edip müdde‘î-i mezbûr da‘vâ-yı mezkûresinden kırk guruş bedel-i makbûz mukābelesinde merkūm Maroke zimmî ile sulh olup müdde‘âsı olan taş ve ota ve bi’l-cümle bağ-ı mezkûra ve müştemilât-ı sâiresine müte‘allika âmme-i de‘âvîden merkūm Maroke zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-Ra sene 1205