Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 354 Hüküm no: 455 Orijinal metin no: [39a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duka v. Yorgi’nin koyun eti bedelinden alacağının taksitler halinde ödenmesini kabul ettiği Ma‘rûz Medîne-i Üsküdar’da Reis mahallesinde mütemekkin Duka v. Yorgi nâm zimmî medîne-i mezbûrede mahfil-i bâbda meclis-i şer‘-i hatîrde Mardıros v. Agop nâm zimmî muvâcehesinde merkūm Mardıros zimmî târih-i i‘lâmdan dört sene mukaddem yedimden ve mâlımdan iştirâ ve kabz eylediği vezn ve fiyâtı beynimizde ma‘lûm lahm-ı ganem semeninden kırk guruş hakkımın on guruşunu yedinden ahz ü kabz ve otuz guruş zimmetinde hakkım bâkī kalmağla taleb ederim deyü da‘vâ ve merkūm Mardıros zimmî ber-vech-i muharrer ikrâr ü i‘tirâf edip mûcebiyle meblağ-ı bâkī-i mezbûr otuz guruşun müdde‘î-i mezbûra edâsıyla merkūm Mardıros zimmî ba‘de’l-ilzâm lâkin meblağ-ı bâkī-i mezbûru hâlen edâya iktidârı olmayıp tecîle tâlib olmağla müdde‘î-i merkūm târih-i i‘lâmdan yirmi bir gün tamamına değin merkūm Mardıros zimmîyi tecîl eyledikde ol dahi ber-vech-i muharrer müeccelen edâya ta‘ahhüd ve hâzır bi’l-meclis Asvador v. Vartan nâm zimmî meblağ-ı bâkī-i merkūm otuz guruş hakkına tarafeynden bi’l-emr ve’l-kabûl kefîl ve dâmin olduğu bi’l-iltimâs huzûr-ı âlîlerine i‘lâm olundu. Fî 9 min-R sene 1205