Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 411 Hüküm no: 425 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Osman’ın evini ve dükkanlarını eşi Fâtıma Hanım’a sattığı Mübâya‘a, 3.000 guruş Mahmiye-i İstanbul’da Laleli çeşme kurbünde sâkin Ali Ağa b. Osman tarafından husûs-ı âti’l-beyâna ikrâra vekîl olduğu Abdullah Ağa b. İbrahim ve Ahmed Ağa b. el-Hâc Mustafa şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan Mustafa Ağa b. Halil meclis-i şer‘-i şerîf-i enverde mezbûr Ali Ağa’nın zevce-i menkûhası olup zâtı ta‘rîf-i şer‘î ile mu‘arrefe olan râfi‘atü hâzihi’l-vesîka Fâtıma Hanım bt. Osman Bey muvâcehesinde bi’l-vekâle ikrâr ve takrîr-i kelâm edip akd-i âtî sudûruna değin müvekkilim mezbûrun yedinde mülkü olup sâlifü’z-zikr Laleli çeşme kurbünde vâki‘ bir tarafdan Haffâf el-Hâc Salih menzili ve bir tarafdan el-Hâc Mehmed menzili ve bir tarafdan Mehmed Çelebi menzili ve bir tarafdan tarîk-i âm ile mahdûd hâriciyyede tabaka-i ulyâda iki bâb ve bir mâbeyn odası ve bir sofa ve bir dehlîz ve bir abdesthâne ve bir kenîf ve vustâda üç bâb oda ve bir kenîf ve süflâda bir ahır ve bir zîr-i zemîn kâ[r]gîr mahzen ve bir bi’r-i mâ ve bir mikdâr havlu ve dâhiliyede kezâlik tabaka-i ulyâda iki bâb oda ve iki sofa bir dehlîz ve vustâda bir bâb oda ve bir dehlîz ve bir kenîf ve süflâda bir bâb oda ve bir hamam ve bir câmekân tâ‘bir olunur oda ve bir kâ[r]gîr mahzen ve bir matbah ve bir bi’r-i mâ ve bir kenîf ve bir mikdâr bahçe derûnunda bir köşk ve havluyu müştemil mülk menzili ile menzil-i mezbûrun tahtında vâki‘ bir bâb boyacı dükkânı ve bir attâr dükkânı ve bir leblebici dükkânı ve bir kahveci dükkânı ve bir yazıcı dükkânı ve bir derzi dükkânlarını cemî‘ tevâbi‘ ve levâhıkı ile ( ) hukūk-ı merâfıkı ile tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç bin guruşa müvekkilim mezbûre Ali Ağa zevcesi merkūme Fâtıma Hanım’a bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve kabz ve kabûl eyledikden sonra semeni olan meblağ-ı mezkûr üç bin guruş mütâlebesinden zevce-i merkūme hanımın zimmetini ibrâ-i âm ile ibrâ ve iskāt edip ba‘de’l-yevm zikri mürûr eden menzil ve dekâkîn zevce-i mezbûre Fâtıma Hanım’ın mülk-i müşterâsı olmuşdur. Keyfemâ-teşâ ve tahtâ[r] mutasarrıfe olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Fahrü’l-kuzât Şemsî Hüseyin Efendi b. Abdülkerim, Mehmed Ağa b. Osman Ağa, Molla Mustafa b. Abdülaziz, Ali b. Eyüb, Hasan b. Abdullah, Mustafa b. Abdullah, İbrahim b. Mustafa, Bıyıklı Ahmed Ağa b. Hüseyin ve gayruhum.