Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 358 Hüküm no: 461 Orijinal metin no: [39b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortak oldukları camcı âletlerindeki hakkına karşılık Yakub b. Mehmed Salih’in Camcı Mehmed ile camcılık yapmayı kabul ettiği Ma‘rûz Medîne-i Üsküdar’da Ahmedçelebi mahallesinde sâkin bi-kazâillâhi te‘âlâ bundan akdem mecnûn olan Camcı Mustafa b. Ömer’in sulbiye kebîre kızı ve umûrunu rü’yete bâ-hüccet-i şer‘iye vasîsi Zeliha nâm hatun medîne-i mezbûrede mahfil-i bâbda meclis-i şer‘-i hatîrde Camcı Yakub b. Mehmed Salih nâm kimesne mahzarında medîne-i mezbûrede Keresteciler Sûku’nda kâin bir bâb camcı dükkânı derûnunda mevcûd beyne’l-hıref gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmenin nısfı mezbûr Yakub’un ve nısf-ı âharı babam mecnûn-ı mezbûrun olup mezbûr Yakub Beşe âlât-ı mezkûrenin nısfını kendi hissesiyle ma‘an tasarruf edip lâkin zevcim olup hâzır bi’l-meclis Camcı Mehmed b. Ali nâm kimesne bî-küsr ve bî-mekân olmağla ben dahi babam mecnûn-ı mezbûrun âlât-ı mezkûrede olan nısf hissesini zevcim mezbûra bi’l-vesâye def‘ ü teslîm ve mezbûr Yakub Beşe ile camcılık işlemek murâd eylediğimde mezbûr Yakub Beşe imtinâ‘ ve bu vechile beynimizde münâza‘ât-ı kesîre vâkı‘a olmuş idi el-hâletü hâzihî işbu hâzırûn bi’l-meclis camcı ustaları tavassutlarıyla mezbûr Yakub Beşe zevcim mezbûr Mehmed ile dükkân-ı mezkûrda ma‘an camcılık işleyip ve zevcim mezbûr dahi nısf âlât-ı mezkûrenin menâfi‘inden babam mecnûn-ı mezbûr için bana beher şehr ikişer guruş vermek üzere ta‘ahhüd eyledikden sonra mezbûrân Yakub Beşe ve zevcim Mehmed’den herbiri âhara müdâhale etmemek üzere beynleri ıslâh olunup kat‘-ı münâza‘a eylediklerini mezbûr Yakub Beşe tasdîk eylediği tescîl ve bi’l-iltimâs huzûr-ı âlîlerine i‘lâm olundu. Fî 11 min-Rebî‘ülevvel sene 1205