Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 359 Hüküm no: 464 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleni bt. Vasil’in kocası Mitro’nun hanımının babasından kalan miras hissesi ile ilgili davanın zaman aşımı nedeniyle reddedildiği Ma‘rûz Medîne-i Üsküdar’a tâbi‘ Çenger karyesinde hâlike olan Eleni bt. Vasil nâm Nasrâniyenin verâseti zevci Mitro v. Piro nâm zimmî ile li-ebeveyn ammi oğulları Panayot ve Petro ve Angeli ve İstefan ve İlya evlâd-ı Mitro nâm zimmîlere münhasıra ve tashîh meselelesi on sehm i‘tibârıyla beş [sehmi] zevc-i merkūma ve bâkī birer sehmden beş sehmi merkūmûn Panayot ve Petro ve Angeli ve İstefan ve İlya’ya isâbeti tahakkukundan sonra arzuhâl eden merkūm Mitro zimmî medîne-i mezbûrede mahfil-i bâbda meclis-i şer‘-i hatîrde merkūm Panayot zimmî muvâcehesinde zevcem hâlike-i merkūmenin babası merkūm Vasil zimmî yirmi sene mukaddem hâlik olmağla merkūm Vasil zimmînin karye-i mezbûrede ve mahmiye-i İslâmbol’da dört kıt‘a bostanını ve bi’l-cümle terekesini merkūm Panayot zimmînin babası merkūm Mitro zimmî fuzûlî kabz edip ba‘dehû merkūm Mitro zimmî dahi hâlik olmağla terekesini merkūm Panayot ile karındaşları merkūmûn ahz edip zevcem hâlike-i merkūmenin hisse-i irsiyesini vermeyip kable’l-ahz hâlike olup bize mevrûs olmağla ber-tashîh-i merkūm hâ[li]ke isâbet eden hisse-i irsiyemi taleb ederim deyü da‘vâ ve merkūm Panayot zimmî inkârından mâ‘adâ hâlik-i mersûme Eline Nasrâniye ammisi hâlik-i merkūm Mitro zimmî ile mahmiye-i mezbûrede ma‘an yirmi sene mütemekkin olup sinîn-i mezkûrede bilâ-özr-i şer‘î sükût edip terk-i da‘vâ eylediği zevc-i merkūm Mitro zimmînin ikrârıyla sâbit ve bu misillü yirmi sene bilâ-özr-i şer‘î terk olunan mîrâs da‘vâsı bilâ-emr mesmû‘a olmayıp müdde‘î-i merkūmun eylediği da‘vâsına iltifât olunmadığı mübâşiri çavuş kulları iltimâsıyla huzûr-ı âlîlerine i‘lâm olundu. Fî 12 min-R sene 1205