Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 360 Hüküm no: 465 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Reis ile ortağı Ali Reis’in kayıklarının içindeki nakit parayla birlikte batmasına sebep olduğu iddiasıyla Hasan Reis’e açtıkları davada sulh oldukları Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Mustafa Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde medîne-i mezbûreye muzâfe Karamürsel kazâsı tevâbi‘inden Ereğli karyesi sükkânından kendi nefsinden asıl ve şerîki Ali Reis b. Abdullah tarafından ber-vech-i âtî vekîl olduğu Mahmud Ağa b. Hüseyin ve İsmail b. Ahmed nâm kimesneler şehâdetleriyle sâbit olan Feyzullah Reis b. Mehmed nâm kimesne meclis-i ma‘kūd-ı mezkûrda çekdirme reislerinden Hasan Reis b. Abdullah tarafından tasdîka vekîl Ali b. Ahmed nâm kimesne mahzarında târih-i i‘lâmdan dört gün mukaddem emlâkımızdan yüz elli guruş kıymetli sagīr çekdirme kayığı ile Âsitâne’ye gelir iken zikr olunan Kādı karyesi civârında Modaburnu önünde müvekkil-i mezbûr Hasan Reis kebîr kayığını âhar mahalle sarf mümkün iken sarf etmeyip üzerimize uğradıp kayığımızı çiğnedip gark etmekle kıymet-i mezkûresi olan yüz elli guruş ile kayık derûnunda mâlımızdan telef olan nakd otuz iki guruş ki cem‘an yüz seksen iki guruşu bi-tarîki’d-damân asâleten ve vekâleten taleb ve da‘vâ sadedinde olduğumda beynimize muslihûn tavassut edip beni da‘vâ-yı mezkûremden müvekkil-i mezbûr Hasan Reis ile elli guruş bedel-i makbûz mukābelesinde sulh eylediklerinde ben dahi sulh-ı mezkûru kabûl ve zikr olunan kayığın kıymetine ve nakd-i merkūma ve bi’l-cümle husûs-ı mezkûra müte‘allika âmme-i de‘âvîden müvekkil-i mezbûr Hasan Reis’in zimmetini ibrâ ve ıskāt eylediğimde ol dahi ibrâmı kabûl eyledi dediğini vekîl-i mezbûr tasdîk edip kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 19 min-R sene 1205