Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 412 Hüküm no: 426 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuşadalı el-Hâc Mehmed’in daha önce zimmetini ibra ettiği için Mehmed b. Ömer ile olan davasının reddedildiği Kalyoncu tâifesinden olup Halil nâm kapudan neferâtından Kuşadalı el-Hâc Mehmed b. Yusuf nâm kimesne meclis-i şer‘-i şerîf-i enverde işbu bâ‘isü’l-kitâb diğer Mehmed b. Ömer nâm kimesne mahzarında üzerine da‘vâ ve takrîr-i kelâm edip mezbûr diğer Mehmed zimmetinde cihet-i deyn-i şer‘îden altmış guruş hakkım olmağla mezbûr diğer Mehmed’e suâl olunup meblağ-ı mezbûru bana edâ ve teslîme tenbîh olunması matlûbumdur dedikde gıbbe’s-suâl mezbûr diğer [-Mehmed] cevâbında târih-i kitâbdan yedi ay mukaddem müdde‘î-i mezbûr el-Hâc Mehmed meblağ-ı mezbûru benden taleb ve da‘vâ sadedinde iken beynimize muslihûn tavassut edip mezbûr el-Hâc Mehmed meblağ-ı mezbûr da‘vâsından huzûr-ı Müslimînde meccânen benim zimmetimi ibrâ-i âmm-ı râfi‘u’l-hısâm ile ibrâ ve iskāt eyledi deyü def‘le mukābele edicek gıbbe’l-istintak ve’l-inkâr mezbûr diğer Mehmed’den def‘-i mezkûruna mutâbık beyyine taleb olundukda udûl-i ahrâr-ı ricâl-i Müslimînden olup mahmiye-i İstanbul’da Cebehâne kurbünde sâkin Mehmed Beşe b. Hasan ve diğer Mehmed Beşe b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr el-Hâc Mehmed târih-i mezkûrda meblağ-ı mezbûr altmış guruşu işbu mezbûr diğer Mehmed’den taleb ve da‘vâ sadedinde iken beynlerine muslihûn tavassut edip müdde‘î-i mezbûr el-Hâc Mehmed meblağ-ı mezbûr altmış guruş da‘vâsından bizim huzûrumuzda meccânen mezbûr diğer Mehmed’in zimmetini ibrâ-i âmm-ı râfi‘u’l-hısâm ile ibrâ ve iskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr el-Hâc Mehmed bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’l-hâmis min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: El-hâc Mustafa Efendi b. ( ), Kādızâde İbrahim Çelebi b. Mustafa, Ahmed Çelebi b. el-Hâc Hasan, Mehmed Çelebi b. Abdullah.