Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 363 Hüküm no: 471 Orijinal metin no: [40b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah ile hanımı Ümmügülsüm’ün vârislerinin terekeden para aldığı iddiasıyla Fatma bt. Hacı Ahmed’e açtıkları davanın sonuçlanmadığı Ma‘rûz Medîne-i Üsküdar’da İhsaniye mahallesinde sâkin iken bundan akdem vefât eden Ahmed b. Abdullah nâm kimesnenin verâseti zevcesi Ümmügülsüm bt. Ali nâm hatun ile sulbiye sagīre kızı Nefise’ye münhasıra ba‘dehû zevce-i mezbûre Ümmügülsüm dahi vefât edip verâseti kızı mezbûre Nefise ile babası mezbûr Ali ve anası Kâmile bt. Mehmed’e münhasıra ba‘dehâ sagīre-i mezbûre Nefise dahi vefât edip verâseti ancak anasının anası mezbûre Kâmile Hatun’a münhasıra ve tashîh meselesi kırk sekiz sehm i‘tibârıyla kırk altı sehmi ümm-i mezbûre Kâmile’ye ve iki sehmi mezbûr Ali’ye isâbeti tahakkukundan sonra mezbûr Ali ile zâtı mu‘arrefe mezbûre Kâmile Hatun Çarşamba günü Dîvân-ı âlî’de ma‘kūd meclis-i şer‘-i hatîrde Fatıma Hanım bt. el-Hâc Ahmed Ağa nâm sagīrenin anası ve vasîsi Zübeyde bt. Abdullah nâm hatun tarafından vekîl olduğu zâtını ârifân Hüseyin b. İsmail ve Mustafa b. Mehmed nâm kimesneler şehâdetleriyle sâbit olan Osman Ağa b. Mehmed mahzarında müteveffâ-yı evvel mezbûr Ahmed sagīre-i mezbûre Nefise’nin babası mezbûr el-Hâc Ahmed Ağa’nın mukaddemâ abd-i memlûkü iken târih-i i‘lâmdan on beş sene mukaddem mâlından i‘tâk edip on bir sene mürûrunda kızımız müteveffât-ı sâniyeyi tezevvüc ve hîn-i akdde dahi mevlâsı mezbûr i‘tâkını ikrâr ve mezbûr el-Hâc Ahmed Ağa dahi vefât edip kızı sagīre-i mezbûre için hakk-ı velâ yoğiken müteveffâ-yı mezbûr Ahmed’in bi’l-cümle terekesini vasîsi mezbûre kabz etmekle bi’l-verâse taleb ederiz deyü da‘vâ ve vekîl-i mezbûr cevâbında fi’l-hakīka müteveffâ-yı mezbûr Ahmed sagīre-i mezbûrenin babası mezbûr el-Hâc Ahmed Ağa’nın abd-i memlûkü olup sekiz sene mukaddem kızı sagīre-i mezbûreye hibe-i sahîha-i şer‘iye ile hibe ve temlik ba‘dehû yine sagīre-i mezbûre için bi’l-velâye ittihâb ve temellük ve kabz ve kabûl edip sagīre-i mezbûrenin gulâm-ı mevhûbu olduğu hâlde vefât etmekle cümle terekesi sagīre-i mezbûrenin mülküdür deyü mukaddemâ babası mezbûrun i‘tâkını inkâr etmeğin müdde‘iyân-ı mezbûrân ıtk da‘vâlarını isbât için beyâna havâle olunup el-yevm şâhid ikāmet edemeyip vekîl-i mezbûr müdde‘âsı olan hibe için bir nefer şâhid ikāmet edip henüz da‘vâlarına faysal verilmediği cerîdede mastûr ve mukayyeddir bâkī fermân hazret-i veliyyü’l-emrindir. Fî 28 min-Ra sene 1205