Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 365 Hüküm no: 473 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamile olan Nefise bt. Ali ile kızı Habibe’yi darp edip çocuklarının düşürmesine sebep oldukları iddiasıyla Ayşe bt. Hüseyin ile Emine bt. Mehmed’e açılan davada sulh oldukları Ma‘rûz Medîne-i Üsküdar’da Tenbel el-Hâc Mehmed mahallesinde sâkin kendi nefsinden asıl ve zevcesi Nefise bt. Ali ve kızı Habibe nâm hatunlar taraflarından ber-vech-i âtî vekîl olduğu zât-ı mezbûretânı ârifân Ali b. Ömer ve Hasan Çelebi b. Ahmed nâm kimesneler şehâdetleriyle sâbit olan sâhib-i arzuhâl el-Hâc İbrahim b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde derûn-ı arzuhâlde isimleri mezkûr Bezistânî Mustafa nâm kimesnenin zevcesi Âişe bt. Hüseyin ve Emine bt. Mehmed nâm hatunlar mahzarlarında mezbûretân Âişe ve Emine bir gün mukaddem zevcem ve kızım müvekkiletân-ı mezbûretân Nefise ve Habibe’nin üzerlerine hücûm ve şütûm-ı galîza ile şetm eylediklerinden mâ‘adâ bi-gayrı hakkın darb etmeleriyle darblarından nâşi herbiri müstebînü’l-hilka iki re’s cenîn-i zeker meyyit ıskāt etmeleriyle mûcib-i şer‘îsini mezbûretân Âişe ve Emine’den bi’l-asâle ve bi’l-vekâle taleb ve da‘vâ eylediğimde onlar dahi külliyen inkâr etmeleriyle beynimizde münâza‘ât-ı kesîre vâkı‘a olmuş idi el-hâletü hâzihî bâ-tavassut-ı muslihîn tasaddî eylediğim da‘vâdan an-inkârin on guruş üzerine beni sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru tamamen yedlerinden bi’l-asâle ve bi’l-vekâle ahz ü kabz edip zikr olunan cenîneynin gurresine ve darb ü şetme müte‘allika âmme-i de‘âvîden mezbûretân Âişe ve Emine ile mezbûr Mustafa’nın zimmetlerini ibrâ ve ıskāt eylediğimde onlar dahi ibrâmı kabûl eyledi dediğini herbiri tasdîk edip bu vechile kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 23 min-R sene 1205