|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 253 Hüküm no: 353 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ali Beşe b. Ali’nin bağa ait kendi hissesini el-Hâc Durak’a sattığı
Vilâyet-i Anadolu’da Kuşadası ahâlîsinden olup mahmiye-i İstanbul’da Hasır iskelesinde mütemekkin olan Ali Beşe b. Ali mahfil-i kazâda işbu râfi‘u’l-kitâb el-Hâc Durak b. el-Hâc Mehmed mahzarında ikrâr-ı tâm ve takrîr-i kelâm edip zikrolunan Kuşadası’nda Andız toprağında Bostan çeşmesi nâm mevzi‘de vâki‘ bir tarafı Kahveci Hasan Beşe yeri ve bir tarafı Mehmed Yazıcı yeri ve bir tarafı İbrahim Çelebi yeri ve bir tarafı tarîk-i âm ile mahdûd hâlâ tasarrufumda olan bir kıt‘a tarlamdan on dönüm yere nısf-ı şâyi‘i benim ve nısf-ı şâyi‘i kendinin olmak üzere mezbûr el-Hâc Durak bağ gars etmek için bin altmış bir senesinde sâhib-i arz ma‘rifetiyle tefvîz edip ol dahi tefevvüz ve kabûl eyleyip zikrolunan on dönüm yere <> minvâl-i muharrer üzere bağ gars eylemiş idi. Ol magrûs olan on dönüm bağdan beş dönüm hisse-i şâyi‘amı mezbûr el-Hâc Durak’a kırk beş kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzere iştirâ ve kabûl eyledikden sonra semeni olan meblağ-ı mezbûr kırk beş guruşu yedinden bi’t-tamam ve’l-kemâl ahz u kabz eyleyip meblağ-ı mezbûru mahallinde tesellüme mezbûr el-Hâc Durak’ı teslît eyledim, ba‘de’l-yevm mezbûr el-Hâc Durak keyfe mâ yeşâ’ ve yehtâr mutasarrıf olsun dedikde gıbbe’t-tasdîk ve’t-taleb mâ-vaka‘a ketb ü sebt olundu.
Fi’l-yevmi’s-sâbi‘ aşer min-Cemâziyelâhire li-sene erba‘a ve sittin ve elf.
Şuhûdü’l-hâl: Himmet Beşe b. Mehmed, Yusuf Beşe b. Ali, el-Hâc Mehmed b. el-Hâc Mehmed, Yusuf Beşe b. Abdullah, Sefer b. el-Hâc Hasan, Akçalı Mustafa Beşe, el-Hâc Abdullah [b.] Ömer Beşe er-râcil, Ömer Beşe b. Derviş Hasan, Ali Bey b. Memi, Veli Beşe b. Mahmud ve gayruhum.
|