Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 412 Hüküm no: 427 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Misivri ve Süzebolu mukataalarını ortak tasarruf eden Aydos ahalisinden el-Hâc Ali Ağa ile Mehmed Ağa’nın birbirlerinin zimmetlerini ibra ettikleri Hilâl-i sutûrda mastûr olan husûsu mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Mustafa Efendi b. el-merhûm Yunus Efendi mahmiye-i İstanbul’da Elvanzâde Mahallesi’nde sâkin Mustafa Ağa b. Ali Bey’in menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf ettikde vilâyet-i Rumeli’nde Aydos kasabası ahâlîsinden olup mahmiye-i mezbûrede müsâfiren sâkin el-Hâc Ali Ağa b. Mustafa meclis-i ma‘kūd-ı mezkûrda şerîki bâ‘isü hâze’l-kitâb Mehmed Ağa b. Mustafa mahzarında takrîr-i kelâm ve bast-ı merâm edip bundan akdem mezbûr Mehmed Ağa ile şirket üzere Misivri ve Süzebolu mukāta‘alarını zabt ve tasarruf eylediğimizde beynimizde nice ahz u i‘tâ cereyân etmişidi el-hâletü hâzihî beynimizde cereyân eden ahz u i‘tâyı hesâb eylediğimizde her birimizin âhar üzerinde bir akçe ve bir habbe hakkı ve müstehakkı zuhûr etmemeğin husûs-ı mezkûra ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve kâffe-i mütâlebât ve muhâsamâtdan her birimiz âharı ibrâ-i âmm-ı râfi‘u’l-hısâm ile ibrâ ve iskāt eyledik min-ba‘d birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Mustafa Çelebi b. Abdullah ve Muhzır Ya‘kub b. Abdullah ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: es-Seyyid Salih Efendi b. es-Seyyid Ali Hoca, Mehmed Efendi b. Hüseyin hulefâ-i mevkūfât, Hüseyin Ağa b. Ahmed an-kasaba-i Aydos, el-Hâc Hasan Ağa b. Ali Akşehr[î], el-Hâc Mehmed Ağa b. Receb, Mustafa Ağa b. Ali, Ali Bey b. İbrahim, Mustafa Efendi b. Abdullah, es-Seyyid Mustafa b. Mustafa.