Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 366 Hüküm no: 475 Orijinal metin no: [41a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleni bt. Vasil’in kocası Mitro’nun mirasdan bazı eşyaların gizlendiği iddiasıyla açtığı davada sulh olduğu Ma‘rûz Medîne-i Üsküdar’a tâbi‘ Çenger karyesinde mütemekkine iken bundan akdem hâlike olan Eline bt. Vasil nâm Nasrâniyenin verâseti zevc-i metrûku Mitro v. Petro nâm zimmî ile li-ebeveyn ammi oğulları Panayot ve Petro ve Angeli ve İstefan ve İlya evlâd-ı Mitro nâm zimmîlere münhasıra ve tashîh meselesi on sehm i‘tibârıyla beş sehmi zevc-i merkūma ve bâkī birer sehmden beş sehmi merkūmûn Panayot ve Petro ve Angeli ve İstefan ve İlya’ya isâbeti tahakkukundan sonra zevc-i merkūm Mitro zimmî medîne-i mezbûrede mahfil-i bâbda meclis-i şer‘-i hatîrde merkūm Panayot zimmî muvâcehesinde zevcem hâlike-i merkūmenin terekesinden kıymetleri yüz altmış dört guruşa bâliğ sekiz aded gömlek ve üç entari ve üç cebe ve on aded sîm yüzüklerini fuzûlî ahz ü kabz etmekle kıymet-i mezkûrelerinden ber-tashîh-i merkūm bana isâbet eden hisse-i irsiyemi taleb ederim deyü eylediği da‘vâsından bâ-tavassut-ı muslihîn otuz guruş bedel-i makbûz mukābelesinde merkūm Panayot ile sulh olup ziyâde müdde‘âsına ve bi’l-cümle husûs-ı mîrâsa müte‘allika âmme-i de‘âvîden merkūm Panayot zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 12 min-R sene 1205