Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 366 Hüküm no: 476 Orijinal metin no: [41a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekkari Ahmed’in kaybettiği katırını elinde bulunduran Mekkari Seyyid Hacı Mahmud’un katırı iade etmesi Ma‘rûz Medîne-i Üsküdar’da misâfiren sâkin mekkârî tâifesinden Ahmed b. Mustafa medîne-i mezbûrede mahfil-i bâbda meclis-i şer‘-i hatîrde yine tâife-i mezbûreden es-Seyyid el-Hâc Mahmud b. Mehmed mahzarında işbu meclis-i şer‘de mu‘âyene olunan emlâkimden yüz seksen guruş kıymetli bir re’s katır yedimde mülküm iken târih-i i‘lâmdan iki buçuk sene mukaddem zâyi‘ olup mezbûr es-Seyyid el-Hâc Mahmud yedinde bulmamla bi’l-istihkāk taleb ederim deyü da‘vâ ol dahi cevâbında târih-i i‘lâmdan bir sene mukaddem Şâm-ı şerîf’de es-Seyyid Mehmed nâm kimesneden yüz elli guruş semen-i makbûza iştirâ ve kabz etmiş idim deyü vaz‘-ı yedini ikrâr lâkin müdde‘î-i merkūmun mülkü olduğunu inkâr etmeğin müdde‘î-i mezbûr ber-vech-i muharrer müdde‘âsını udûlden Hüseyin b. Ahmed ve es-Seyyid Halil nâm kimesneler şehâdetleriyle muvâcehesinde vech-i şer‘î üzere ba‘de’l-isbât ve’t-tahlîf mûcebiyle zikr olunan katırı müdde‘î-i mezbûra teslîme mezbûr es-Seyyid el-Hâc Mahmud’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 24 min-Rebî‘ülâhir sene 1205