Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 368 Hüküm no: 479 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Avanis’in alacağının ödenmesi talebiyle açtığı davayı ispat edemediği Ma‘rûz Medîne-i Üsküdar’a tâbi‘ Kādı karyesi mütemekkinlerinden İstefan v. Avanis nâm zimmî medîne-i mezbûrede mahfil-i bâbda meclis-i şer‘-i hatîrde Toros v. Davit nâm zimmî muvâcehesinde bin iki yüz senesi Rebî‘ülâhir’i gurresinden merkūm Toros ile gāibûn ani’l-meclis Papa Mıgırdıç ve İstefan ve Abraham ve Kiragos ve Haçador ve Zovik ve Nikagos ve Hokober? ve Avadik ve Ağya ve Rapail ve Sahak ve Kestedor ve Artin ve Hanparsum ve Kazer nâm zimmîlerden herbiri ma‘an yedimden iktirâz ve kabz eyledikleri iki bin iki yüz elli guruş zimmetlerinde hakkım olup hattâ târih-i merkūmda cihet-i mezkûreden ol-mikdâr deynleri olduğunu ikrâr ve herbiri âharın zimmetine lâzım gelen meblağa kefîl ve dâmin ve târih-i mezkûr ile müverrah yedime zimmî hattıyla bir kıt‘a deyn temessüğü i‘tâ ve meblağ-ı merkūmun dokuz yüz on guruşunu yedlerinden ahz ve istifâ ve bâkī kalan bin üç yüz kırk guruşun merkūm Toros zimmîden asâlet ve kefâletine binâen taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm İstefan zimmî müdde‘âsını isbât edemeyip talebiyle merkūm Toros zimmî gıbbe’t-tahlîfi’ş-şer‘î mûcebiyle müdde‘î-i merkūm İstefan zimmî da‘vâ-yı mezkûresiyle merkūm Toros zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 20 min-Rebî‘ülâhir sene 1205