Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 368 Hüküm no: 480 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Kasım’ın boşandığı kocası ile mehir ve nafakası için anlaştıkları Ma‘rûz Medîne-i Üsküdar’da Aşcıbaşı mahallesinde sâkine mu‘arrefetü’z-zât Âişe bt. el-Hâc Kasım nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı es-Seyyid Ali b. Ahmed muvâcehesinde ben mezbûr es-Seyyid Ali’nin yirmi dokuz guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan otuz iki gün mukaddem beni tatlîk etmekle mezbûrun zimmetinde mütekarrir ve ma‘kūdün-aleyh olan mârrü’z-zikr yirmi dokuz guruş mehr-i müeccelim ve bin iki yüz üç senesi Muharremi’l-harâm’ının yedinci günü târihiyle müverrah yedimde olan bir kıt‘a deyn temessüğü mantûkunca yedimden ve mâlımdan bi-tarîki’l-karz istidâne ve kabz eylediği doksan guruş ki cem‘an ciheteyn-i mezkûreteynden yüz on dokuz guruş ile nafaka-i iddet-i ma‘lûmem ve meûnet-i süknâmı zevc-i sâbıkım mezbûr es-Seyyid Ali’den taleb ederim deyü da‘vâ ol dahi cevâbında fi’l-hakīka müdde‘iye-i mezbûre on beş guruş mehr-i müeccel tesmiyesiyle zevcesi olup ber-vech-i muharrer târih-i mezbûrda tatlîkini ve cihet-i karzdan ahz ettiği ancak kırk guruş ki cem‘an elli beş guruş zimmetinde deyni olduğunu ikrâr ziyâdeyi inkâr etmeğin müdde‘iye-i mezbûre Âişe Hatun ber-vech-i muharrer ziyâde müdde‘âsını isbâta ba‘de’l-havâle mertebe-i ikrârı olan meblağ-ı merkūm elli beş guruşun müdde‘iye-i mezbûreye edâsıyla mezbûr es-Seyyid Ali ilzâm olundukdan sonra müdde‘iye-i mezbûre Âişe Hatun’u bakıye-i nafaka-i iddet-i ma‘lûme ve meûnet-i süknâsı için zevci mezbûr es-Seyyid Ali ile üç guruş üzerine terâzî eyledikleri bi’l-iltimâs huzûr-ı âlîlerine i‘lâm olundu. Fî 15 min-R sene 1205