Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 369 Hüküm no: 481 Orijinal metin no: [41b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikagos v. Toros’dan beygir satın alan Kirkor’un kalan borcunu ödemesi Ma‘rûz Medîne-i Üsküdar’da Karabaşhânı’nda mütemekkin Nikagos v. Toros nâm zimmî tarafından ber-vech-i âtî vekîl olduğu Memiş Çelebi b. Mustafa ve es-Seyyid Mustafa b. Mehmed nâm kimesneler şehâdetleriyle sâbit olan sulbî kebîr oğlu Karabet v. el-merkūm Nikagos nâm zimmî medîne-i mezbûrede mahfil-i bâbda meclis-i şer‘-i hatîrde Kirkor v. Serkiz nâm zimmî muvâcehesinde merkūm Kirkor zimmî târih-i i‘lâmdan kırk gün mukaddem babam müvekkilim merkūm Nikagos zimmî yedinden iştirâ ve kabz eylediği bir re’s doru bârgir semeninden yirmi buçuk guruş hakkı olmağla meblağ-ı merkūmu merkūm Kirkor zimmîden bi’l-vekâle taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yirmi buçuk guruşun müvekkil-i merkūm Nikagos zimmî için vekîl-i merkūm Karabet zimmîye edâsıyla merkūm Kirkor zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 22 min-R sene 1205