Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 370 Hüküm no: 484 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin’den beygir satın alan Anaştaş’ın borcunu ödemesi Ma‘rûz Medîne-i Üsküdar’a tâbi‘ Bulgurlu karyesinde sâkin es-Seyyid Hüseyin b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde Anaştaş v. Nikola nâm zimmî muvâcehesinde merkūm Anaştaş zimmî târih-i i‘lâmdan bir sene mukaddem emlâkimden bir re’s doru bârgirimi elli dört guruşa yedimden iştirâ ve tesellüm ve meblağ-ı merkūmun on bir buçuk guruşunu yedinden ahz ü kabz edip kırk iki buçuk guruşu merkūm Anaştaş zimmetinde kalmağla hâlâ taleb ederim deyü da‘vâ ol dahi cevâbında bârgir-i merkūmu ancak elli guruşa iştirâsını ikrâr ve ziyâdeyi ba‘de’l-inkâr müdde‘î-i mezbûr es-Seyyid Hüseyin ziyâde müdde‘âsı olan meblağ-ı merkūm dört guruşu udûlden İmâm Mehmed Emin Efendi b. el-Hâc Mehmed ve Mehmed b. Ahmed nâm kimesneler şehâdetleriyle vech-i şer‘î üzere merkūm Anaştaş muvâcehesinde isbât etmeğin mûcebiyle meblağ-ı bâkī-i merkūm kırk iki buçuk guruşu müdde‘î-i mezbûr es-Seyyid Hüseyin’e edâ ve teslîme merkūm Anaştaş zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-R sene 1205