Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 371 Hüküm no: 485 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Şaycı’nın satın aldığı iki çalılık ile bir kireç fırınının kendisine teslim edilmesi Ma‘rûz Medîne-i Üsküdar’da Yenimahalle’de mütemekkin Karabet v. Şaycı nâm zimmî medîne-i mezbûrede mahfil-i bâbda meclis-i şer‘-i hatîrde Süleyman b. Ali ve Ömer b. Mehmed nâm kimesneler mahzarlarında medîne-i mezbûrede âsûde merhûm Hüdâî es-Seyyid eş-Şeyh Mahmud Efendi hazretleri vakfı hudûdu dâhilinde olan medîne-i mezbûreye tâbi‘ Bulgurlu karyesinde vâki‘ etrâf-ı erba‘ası benim tarlam ve Molla İsmail tarlası ve Molla Ömer bağı ve Südlüçayır ile mahdûd arsasının merhûm-ı mûmâ-ileyh es-Seyyid eş-Şeyh Mahmud Efendi hazretleri vakfına mukāta‘a-i kadîmesi olup cevânib-i erba‘ası hendek ile muhât ve mahfûz tahmînen on dönüm mikdârı bir kıt‘a mülk çalılık ve yine karye-i mezbûrede vâki‘ etrâf-ı erba‘ası kireç fırını ve tarîk-ı âm ile mahdûd tahmînen otuz dönüm mikdârı derûnunda bir aded kireç hark olunan fırını hâvî kezâlik bir kıt‘a mülk çalılık ki cem‘an kırk dönüm mikdârı iki kıt‘a mülk çalılık mezbûrân Süleyman ve Ömer’in yedlerinde münâsafaten mülkleri iken târih-i i‘lâmdan üç sene mukaddem yetmiş guruşa bana bey‘ ve temlik ben dahi ba‘de’l-iştirâ ve’t-temellük ve’l-kabûl semen-i mezkûr yetmiş guruşun beş guruşunu mezbûr Süleyman’a edâ ve teslîm mâ‘adâ altmış beş guruşunu mezbûrânın emirleriyle mezbûr Süleyman’ın karındaşı gāib ani’l-meclis İbrahim nâm kimesneye teslîm edip ol-vechile zikr olunan iki kıt‘a çalılık ve kireç fırını mülk-i müşterâm olmuş iken fuzûlî vaz‘-ı yed ederler suâl olunup kasr-ı yedlerine tenbîh olunmak matlûbumdur deyü da‘vâ ve mezbûrân Süleyman ve Ömer cevâblarında zikrleri mürûr eden iki kıt‘a çalılığın ancak çalısını kat‘ için müdde‘î-i merkūma semen-i mezkûr yetmiş guruşa bey‘lerini ve beş guruş kabzlarını ikrâr lâkin arsalarını ma‘an bey‘ eylediklerini ve semen-i meblağ-ı merkūm altmış beş guruşu gāib-i mezbûr İbrahim’e teslîm emirlerini inkâr etmeleriyle müdde‘î-i merkūm ber-vech-i muharrer müdde‘âsını isbâtdan ızhâr-ı acz birle mezbûrân Süleyman ve Ömer’e yemîn teklif olundukda herbiri yemînden nükûl etmeleriyle mûcebiyle zikrleri mürûr eden iki kıt‘a çalılık ve kireç fırınından kasr-ı yed ve müdde‘î-i merkūma teslîme mezbûrân Süleyman ve Ömer’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 6 min-Ra sene 1205