Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 413 Hüküm no: 428 Orijinal metin no: [98a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran seferi dolayısıyla satın alınan malların bedelinin Çukadâr İbrahim Ağa tarafından tamamen ödendiği Vilâyet-i Anadolu’da Karaman Ereğlisi kazâsına tâbi‘ Pınarbaşı kasabası ahâlîsinden olan ma‘lûmü’l-esâmî mahsûrü’l-eşhâs tarafından husûs-ı âti’l-beyâna vekîlleri olduğu Konevî el-Hâc Ahmed b. el-Hâc Hasan ve Aladağî Molla Mehmed b. Nasuh nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Abdülbâki b. el-Hâc Veli meclis-i şer‘-i şerîfde bâ‘isü hâze’l-kitâb Çukadâr İbrahim Ağa b. Ahmed mahzarında bi’l-vekâle ikrâr ve takrîr-i kelâm edip bin yüz kırk üç senesinde İran seferine memûr olan asâkir-i nusret-şi‘âr için müvekkilûn-ı mezbûrûnun mârru’z-zikr Pınarbaşı menzilinde cem‘ ve tahsîl eyledikleri arpa ve un ve saman ve kömür ve odun bahâlarından olan cem‘an bin beş yüz yirmi guruşu mezbûr Çukadâr İbrahim Ağa tamamen bana edâ ve teslîm ben dahi ber-vech-i muharrer bi’l-vekâle yedinden tamamen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 min-Zilka‘de li-sene 1143. Şuhûdü’l-hâl: Kethüdâ Abdülbâki, Vâlidehanı’nda sâkin Hacı Ahmed, Molla Mehmed İmâmzâde, Abdurrahman Efendi imâm, Mehmed Çelebi b. Abdullah, İbrahim b. Mustafa du‘âcı, Mehmed Efendi b. Hasan Efendi.