Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 372 Hüküm no: 486 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu esnafının nizama aykırı iç yağı satışı yaptığından şikâyet ettikleri Kasap Nikola’nın nizama uygun şekilde satış yapmaya söz verdiği Ma‘rûz Medîne-i Üsküdar’da mumcu esnâfından Hasan b. Cafer [ve] el-Hâc Ömer b. Ebûbekir ve Mustafa b. Hüseyin nâm kimesneler medîne-i mezbûrede mahfil-i bâbda meclis-i şer‘-i hatîrde medîne-i mezbûre civârında Beylerbeyi karyesinde Kasab Nikola v. Margarit nâm zimmî muvâcehesinde kasab tâifesi dükkânlarında zebh eyledikleri koyun ve keçiden hâsıl olan iç yağını narh üzere bize bey‘ ve teslîm biz dahi mum i‘mâl edip ibâdullâha bey‘ etmek bâ-emr-i âlî nizâm-ı mer‘iyeden iken bu esnâda merkūm Nikola tama‘-ı hâmından nâşi dükkânından hâsıl olan iç yağını hufyeten mum i‘mâl ve ziyâde bahâ ile bilâd-ı sâireye bey‘ edip bu vechile hâsıl olan iç yağını itlâf ve ibâdullâhın muzâyakalarına bâdî ve nizâm-ı mer‘iyenin ihtilâline bâ‘is olur deyü teşekkî ve merkūm Kasab Nikola zimmî cevâbında fi’l-hakīka hâl mumcu esnâfı merkūmûnun teşekkîleri üzere olduğunu ikrâr lâkin fîmâ-ba‘d mugāyir-i nizâm-ı mezkûr hareket etmeyip dükkânında hâsıl olan iç yağını narh-ı rûzî üzere mumcu esnâfına bey‘ etmek üzere ta‘ahhüd ve hilâf-ı ta‘ahhüd hareket etmemek üzere nefsine işbu hâzır bi’l-meclis Yani v. Panayot nâm zimmî kefîl olup mezbûrûn dahi kefâletini kabûl edip bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 27 min-Ra sene 1205