Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 372 Hüküm no: 487 Orijinal metin no: [42a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin ve kızkardeşi Ümmügülsüm’ün, Şarlızade Osman Ağa ile ortak oldukları evin kirasından hisselerine düşen paranın ödenmesine karar verildikten sonra üç yıllığına ev hisselerini Şarlızade Osman Ağa’ya kiraladıkları Ma‘rûz Medîne-i Üsküdar’da Evliyâhoca mahallesi sükkânından kendi nefsinden asıl ve li-ebeveyn kız karındaşı Ümmügülsüm bt. Ömer nâm hatun tarafından ber-vech-i âtî vekîl olduğu zâtını ârifân Molla Ömer b. Ali ve es-Seyyid İbrahim b. Hüseyin nâm kimesneler şehâdetleriyle sâbit olan Mehmed Emin nâm kimesne medîne-i mezbûrede mahfil-i bâbda meclis-i şer‘-i hatîrde Şarlızâde Osman Ağa b. Hüseyin muvâcehesinde mahalle-i mezbûrede vâki‘ ma‘lûmü’l-hudûd bir bâb menzil dört sehm i‘tibârıyla iki sehmi mezbûr Osman’ın ve birer sehmden iki sehmi benim ile müvekkilem mezbûrenin tasarrufumuzda olup târih-i i‘lâmdan dört buçuk sene [42b] mukaddem nısf menzil-i mezkûru beher şehr otuzar para ücret ile âhara îcâr ve hâsıla olan ücretini ahz ü kabz ve benim ile müvekkilem mezbûreye îsâle tarafımızdan mezbûr Osman Ağa’yı tevkîl etmişidik el-hâletü hâzihî sinîn-i mezkûrede nısf menzil ücretinden ahz ü kabz eylediği kırk buçuk guruşu bize edâ etmeyip hâlâ zimmetinde kalmağla asâleten ve vekâleten taleb ederim deyü da‘vâ ol dahi cevâbında sinîn-i mezkûrede nısf menzil ücretinden ancak on beş [guruş] hâsıla olup kabz eylediğini ikrâr ziyâde kabzını inkâr etmeğin müdde‘î-i mezbûr ber-vech-i muharrer ziyâde müdde‘âsını isbâtdan ızhâr-ı acz edip tahlîfe dahi tâlib olmamağla mûcebiyle müdde‘î-i mezbûr asâleten ve vekâleten ziyâde mutâlebesinden mezbûr Osman’a bilâ-beyyine mu‘ârazadan ba‘de’l-men‘ mezbûr Osman kabzını mu‘terif olduğu on beş guruşun müdde‘î-i mezbûra edâsıyla şer‘an ilzâm olundukdan sonra yine müdde‘î-i mezbûr nısf menzil-i mezkûru târih-i kitâbdan beher şehr tamamında yirmişer paradan üç sene tamamına değin cem‘an on sekiz guruş ücret ile asâleten ve vekâleten mezbûr Osman Ağa’ya îcâr ol dahi ber-vech-i muharrer istîcâr ve kabûl edip bu vechile [kat‘-ı] münâza‘a eyledikleri bi’l-iltimâs huzûr-ı âlîlerine i‘lâm olundu. Fî 27 min-Z sene 1204