Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 373 Hüküm no: 488 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. Ali’nin ortak oldukları tarlalarını ziraat eden Seyyid Hüseyin ile sulh olduğu Ma‘rûz Mahrûse-i Galata muzâfâtından kasaba-i Tophâne’de Boğazkesen mahallesinde sâkin Musa b. Ali nâm kimesne medîne-i Üsküdar’da mahfil-i bâbda meclis-i şer‘-i hatîrde es-Seyyid Hüseyin b. Süleyman nâm kimesne mahzarında Vilâyet-i Anadolu’da Çerkeş kazâsına tâbi‘ Tirbaşı karyesi toprağında vâki‘ lede’l-ahâli ve’l-cîrân ma‘lûmü’l-hudûd ve’l-kıt‘a tahmînen yirmi keyl tohum istî‘âb eder tarlanın bâ-izn-i sâhib-i arz mezbûr es-Seyyid Hüseyin ile münâsafaten tasarrufumuzda olup mezbûr es-Seyyid Hüseyin işbu târih-i i‘lâma gelince on beş seneden berü tarla-yı mezkûrlarda olan nısf hissemi kendi hissesiyle ma‘an zabt ve zirâ‘at etmekle sinîn-i mezkûrede lâzım gelen ecr-i mislini mezbûr es-Seyyid Hüseyin’den taleb ederim [deyü da‘vâya] tasaddî eylediğimde beynimizde muslihûn tavassut edip beni da‘vâ-yı mezkûremden otuz guruş üzerine sulh eylediklerinde ben dahi sulh-ı mezkûru kabûl ve sâlifü’z-zikr tarlanın ecr-i misline ve bi’l-cümle husûs-ı mezkûra müte‘allika âmme-i de‘âvîden mezbûr es-Seyyid Hüseyin’in zimmetini ba‘de’l-ibrâ ve’l-kabûl bedel-i sulh-ı merkūm otuz guruşu edâ ve teslîm eylemek üzere ta‘ahhüd ve bu vechile kat‘-ı münâza‘a eylediklerini mezbûr es-Seyyid Hüseyin tasdîk eylediği tescîl ve bi’l-iltimâs huzûr-ı âlîlerine i‘lâm olundu. Fî 25 min-R sene 1205