Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 374 Hüküm no: 489 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Abdi’nin, bağ hissesi konusunda açtığı davada haksız bulunduğu Ma‘rûz Medîne-i Üsküdar’a muzâfe Kartal nâhiyesine tâbi‘ Dolayoba karyesinde sâkine ve zâtı mu‘arrefe sâhibe-i arzuhâl İsmihan bt. Abdi nâm hatun medîne-i mezbûrede mahfil-i bâbda meclis-i şer‘-i hatîrde hâlâ Üsküdar ustası arzuhâlde mezkûr el-Hâc Ali Ağa b. Mehmed mahzarında karye-i mezbûre hâricinde Şumnu toprağında vâki‘ etrâf-ı erba‘ası Kandeoğlu veresesi bağı ve Hacı Ömeroğlu tarlası ve Mehmed Yazıcı bağı ve Bulgaroğlu bağı ve tarîk-ı âm ile mahdûd tahmînen on altı dönüm mikdârı bir kıt‘a kürûmu mülk bağ zevcim olup bundan akdem vefât eden Ömer Reis’in ile’l-vefât yedinde mülkü ve ba‘de vefâtihî rub‘u bana ve selâse-i erba‘ı li-ebeveyn kız karındaşı Âişe ve li-ebeveyn er karındaşı oğlu Abdi’ye mevrûs olmağla biz bağ-ı mezkûru târih-i i‘lâm senesi Saferi’l-hayr’ın on yedinci günü kızımın oğlu gāib ani’l-beled Kalyoncu Mehmed nâm kimesneye dört yüz guruşa bey‘ ve temlik ve semen-i mezkûrdan bana isâbet eden yüz guruş mutâlebesinden gāib-i mezbûrun zimmetini ibrâ edip ol dahi bağ-ı mezkûru otuz dokuz gün mürûrunda işbu mezbûr el-Hâc Ali Ağa’ya bey‘ ve temlik edip lâkin ben hîn-i bey‘de gāib-i mezbûr Kalyoncu Mehmed ölünce görüp gözetmek şartıyla bey‘ edip bey‘-i mezkûr fâsid olmağla bağ-ı mezkûrdan mülk-i mevrûsum olan rub‘ hissemi taleb ederim deyü takrîr-i meşrûhası üzere mezbûr el-Hâc Ali Ağa’dan eylediği rub‘ bağ da‘vâsı meşrû‘a olmayıp bey‘ eylediği gāib-i mezbûr Kalyoncu Mehmed’e mülâkī oldukda ba‘de’s-sübût yevm-i kabzda olan kıymetini tazmîn iktizâ eylediği bi’l-iltimâs huzûr-ı âlîlerine i‘lâm olundu. Fî 28 min-R sene 1205