Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 414 Hüküm no: 429 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefât eden Ahmed Beşe’nin vârisi olduğu Vilâyet-i Anadolu’da Karaağaç-ı Yalvaç kazâsına tâbi‘ Çatlı nâm karye ahâlîsinden olup Görele kazâsına tâbi‘ Pazarköy nâm karyede müsâfiren sâkin iken bundan akdem vefât eden Ahmed Beşe b. Abdullah b. Mehmed’in li-ebeveyn kız karındaşı Âişe Hatun tarafından ber-vech-i âtî hasren verâset ve vekâlet iddi‘â eden mezbûre Âişe’nin zevci işbu sâhibü’l-kitâb es-Seyyid İbrahim b. el-Hâc Receb nâm kimesne meclis-i şer‘-i hatîr-i lâzımü’t-tevkīrde zikrolunan Pazarköyü’nde hâlâ serdâr olup müteveffâ-i mezbûrun terekesinden zikri âtî bahçeye vâzı‘u’l-yed idiği lede’ş-şer‘i’l-enver sâbit ve mütehakkık olan Halil Beşe b. Ali nâm kimesne mahzarında üzerine da‘vâ ve takrîr-i kelâm edip zevcem mezbûre Âişe müteveffâ-i mezbûr Ahmed Beşe ile li-ebeveyn karındaşlar olup babaları adı mezbûr Abdullah ve dedeleri adı mezbûr Mehmed ve anaları adı Fâtıma bt. Abdullah nâm hatun ve maskat-ı re’sleri Çatlı nâm karyedir müteveffâ-i mezbûrun mezbûre Âişe li-ebeveyn kız karındaşı ve hasren vârisi olup bundan gayrı vârisi ve terekesine müstahik âharı olmayıp mezbûre Âişe müteveffâ-i mezbûrun terekesini mezbûr Halil Beşe’den ve sâir terekesine vâzı‘u’l-yed olanlardan taleb ve da‘vâ ve ahz u kabz ve kendiye îsâle ve bunlar mütevakkıf olduğu umûrun küllîsine tarafından beni vekîl ve nâib-i menâb nasb ve ta‘yîn eyledikde ben dahi vekâlet-i mezbûreyi kabûl ve merâsimini edâya ta‘ahhüd eylediğim ecilden mezbûr Halil Beşe müteveffâ-i mezbûrun terekesinden zikr olunan Pazarköyü karyesinde vâki‘ bir tarafdan Nazlıoğlu Ahmed Beşe bahçesi ve bir tarafdan el-Hâc Ali bahçesi ve bir tarafdan Pasdırmacıoğlu İbrahim bahçesi ve bir tarafdan tarîk-i âm ile mahdûd iki dönüm dut bahçesini ba‘de vefâtihi irsen kız karındaşı mezbûre Âişe Hatun’a isâbet ve intikāl etmişiken merkūm Serdâr Halil Beşe zikrolunan bahçeyi müteveffâ-i mezbûrun vârisi olmamak zu‘muyla altmış guruş semen-i misli var iken noksan-ı fâhiş ile otuz üç guruşa beytülmâl emîni İsmail Çavuş nâm kimesneden iştirâ eyledim deyü bi-gayr-ı hakkın vaz‘-ı yed etmekle merkūm Serdâr Halil Beşe’ye suâl olunup mârru’z-zikr bahçeden kasr-ı yedi müvekkile-i mezbûre için mahallinde bana teslîme tenbîh olunmasını bi’l-vekâle matlûbumdur dedikde gıbbe’s-suâl mezbûr Halil Beşe cevâbında fi’l-vâki‘ zikrolunan bahçe müteveffâ-i mezbûrun terekesinden olup vâris ve vârisesi olmamak zu‘muyla emîn-i mezkûrdan otuz üç guruşa semen-i medfû‘ ve makbûza iştirâ ve tesellüm eylemişidim deyü vaz‘-ı yedini ikrâr mâ‘adâyı inkâr edicek evvelâ müdde‘î-i mezbûrdan mezbûre Âişe müteveffâ-i mezbûrun li-ebeveyn er [kız] karındaşı ve hasren vârisesi ve tarafından ber-vech-i muharrer vekîli olduğuna beyyine taleb olundukda ahrâr-ı ricâl-i Müslimînden ve zikrolunan Pazarköyü karyesi ahâlîsinden olup mahrûse-i Galata’da Arab Câmi‘-i şerîfi kurbünde müsâfiren sâkin kayıkçı tâifesinden Ali Beşe b. Mehmed ve Mustafa Beşe b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Âişe müteveffâ-i mezbûr Ahmed Beşe’nin li-ebeveyn kız karındaşı olup babaları adı Abdullah ve dedeleri adı Mehmed ve anaları adı Fâtıma bt. Abdullah ve maskat-ı re’sleri Karaağaç-ı Yalvaç kazâsına tâbi‘ Çatlı nâm karyedir mezbûre Âişe müteveffâ-i mezbûrun li-ebeveyn kız karındaşı ve hasren vârisesidir ve mezbûr Âişe müteveffâ-i mezbûrun terekesini vâzı‘u’l-yed olan merkūm Serdâr Halil Beşe’den ve sâir vâzı‘u’l-yed olanlardan taleb ve da‘vâ ve ahz u kabz ve kendiye îsâle tarafından zevci mezbûr es-Seyyid İbrahim’i bizim huzûrumuzda vekîl ve nâib-i menâb nasb ve ta‘yîn eyledikde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm etmişidi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eyledikde gıbbe’t-ta‘dîl ve’t-tezkiye şehâdetleri makbûle olmağın ve zikrolunan dut bahçesinin semen-i misli altmış guruşdur deyü yine medîne-i mezkûre ahâlîsinden Halil Beşe b. Mehmed ve Salih Beşe b. Mustafa nâm kimesneler alâ-tarîkı’ş-şehâde ihbâr etmeğin mûcebiyle ba‘de’l-hükm zikrolunan dut bahçesinden kasr-ı yed ve mahallinde vekîl-i mezbûra teslîme mezbûr Serdâr Halil Beşe’ye tenbîh-birle mâ-vaka‘a bi’t-taleb ketb olundu. Fî 28 Şa‘bân sene 1143. Şuhûdü’l-hâl: es-Seyyid Süleyman b. es-Seyyid Halil, es-Seyyid Hasan Çelebi b. es-Seyyid Hüseyin, Salih Beşe b. Mustafa, İbrahim Çelebi b. Şa‘ban, Mehmed Beşe b. Mevlüd, Mustafa b. Hasan, Abdullah Beşe b. Mustafa, İlyas b. İbrahim, Himmet Beşe b. İvaz, Ali b. Muharrem, Mahmud Çelebi b. İsmail.