Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 379 Hüküm no: 502 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın borcunu ödemesi Ma‘rûz Mahmiye-i İslâmbol’da Eminönü İskelesi’nde gümrük kurbünde bakkāl arzuhâl eden Ananosti v. Danyal nâm zimmî meclis-i şer‘-i hatîrde arzuhâlde ismi mezkûr Osman Ağa b. el-Hâc Bekir nâm kimesne mahzarında mezbûr Osman Ağa zimmetinde beynimizde ma‘lûm ecnâs zehâir semeninden yüz yetmiş guruş hakkım olup hattâ işbu târih-i i‘lâm şehri gurresinde cihet-i mezkûreden ol-mikdâr meblağ bana deyni olduğunu ikrâr ve yedime bir kıt‘a deyn temessüğü i‘tâ etmekle taleb ederim deyü takrîrine mutâbık bir kıt‘a deyn temessüğü ibrâzıyla da‘vâ ve mezbûr Osman Ağa cevâbında fi’l-hakīka cihet-i mezkûreden müdde‘î-i mezbûr[a] yüz yetmiş guruş deyni olduğunu ikrâr lâkin târih-i merkūmdan yüz seksen bir gün tamamında edâ etmek üzere beni tecîl etmiş idi deyü eylediği tecîl da‘vâsını müdde‘î-i merkūm mukırr u mu‘terif olmağın mûcebiyle deyn-i meblağ-ı merkūm yüz yetmiş guruşu ecel-i merkūm hulûlünde müdde‘î-i merkūma edâ etmek üzere mezbûr Osman Ağa şer‘an ilzâm olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 12 min-Ca sene 1205