Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 415 Hüküm no: 430 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. İlyas ile Ali Çelebi b. Mehmed’in aralarındaki alacak davasında sulh oldukları Bâ-imzâ-i hazret-i efendi, sulh 585 guruş. Fi’l-asl Üsküp ahâlîsinden olup mahmiye-i İstanbul’da müsâfiren sâkin Hasan b. İlyas nâm kimesne meclis-i şer‘-i şerîf-i enverde râfi‘u’l-vesîka Ali Çelebi b. Mehmed nâm kimesne mahzarında ikrâr ve takrîr-i kelâm edip mezbûr Ali Çelebi bundan akdem vefât eden Ahmed b. Mehmed’in hayâtında Üsküp sancağında mutasarrıf olduğu tımarını “sana ferâgat eylesin bana beş yüz seksen beş guruş teslîm ile mahalline var eğer tımarı beğenir isen küllü ferağ ve kasr-ı yed eyleyesin” deyü yedimden beş yüz seksen beş guruş kabz eylediğinden sonra ben dahi tımar-ı mezbûr için Üsküp’e gittiğimde mezbûr Ahmed bi-emri’llâhi te‘âlâ vefât edip tımarı âhara tevcîh olunmağla mezbûr Ali Çelebi’ye medfû‘um olan beş yüz seksen beş guruşu mezbûr Ali’den dîvân-ı hazret-i sadrâzamîde ma‘kūd meclis-i şer‘de da‘vâ eylediğimde ol dahi meblağ-ı mezbûru yedimden kabzını inkâr etmekle beynimizde münâza‘ât-ı şedîde vâkı‘a olmuş idi el-hâletü hâzihî beynimize muslihûn tavassut edip da‘vâ-yı mezkûremden mezbûr Ali Çelebi ile beni iki yüz guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan iki yüz guruşu yedinden tamamen ve kâmilen ahz u kabz edip mâ‘adâ üç yüz elli sekiz guruşa müte‘allika da‘vâdan mezbûr Ali Çelebi’nin zimmetini ibrâ ve iskāt eyledim dedikde mezbûr Ali Çelebi dahi bedel-i sulh deyü merkūm Hasan’a medfû‘u olan iki yüz guruşa müte‘allika da‘vâdan mezbûr Hasan’ın zimmetini ibrâ ve iskāt etmeğin mâ-vaka‘a bi’t-taleb ketb olundu. Fi’l-yevmi’l-hâmis min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Hasan Ağa b. Ahmed, Kapıkethüdâsı Mehmed Çelebi b. ( ), Ahmed Çavuş b. Ömer, Abdullah Bey b. Mahmud, Ahmed Bey b. Abdullah.