Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 382 Hüküm no: 508 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Mehmed’in hizmet bedelinin ödenmesi talebiyle Şekerci Hafız Seyyid Ahmed ile Bostancı Hacı Halil’e açtığı davada haksız bulunduğu Ma‘rûz Hammâl tâifesinden Mehmed b. Osman nâm kimesne medîne-i Üsküdar’da meclis-i şer‘-i hatîrde Şekerci Hafız es-Seyyid Ahmed b. es-Seyyid Mustafa ve Bostanî el-Hâc Halil b. İsmail nâm kimesneler muvâcehelerinde gāib ani’l-meclis İslâmbol’da Yağkapanı tüccârlarından el-Hâc Mehmed nâm kimesne ile mezbûr Hafız es-Seyyid Ahmed ve Bostanî el-Hâc Halil beynlerinde ma‘lûmü’l-aded ağnâm ticâretinde akd-i şirket etmeleriyle ben gāib-i mezbûr el-Hâc Mehmed’in emir ve talebiyle ücret kavlinsiz on beş ve yirmi gün mikdârı ağnâm-ı ma‘hûdeleri bey‘ ü şirâsında mezbûr el-Hâc Mehmed’e i‘ânet ve hizmet etmemle müstahak olduğum ecr-i mislimi mezbûrân Hafız es-Seyyid Ahmed ve Bostanî el-Hâc Halil’den taleb ederim deyü takrîr-i meşrûhu üzere tasaddî eylediği da‘vâsına şer‘an iltifât olunmadığı bi’l-iltimâs huzûr-ı âlîlerine i‘lâm olundu. Fî 18 min-Ca sene 1205