Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 385 Hüküm no: 513 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Bektaş’ın boşandığı kocası Mustafa ile eşyaları hususunda anlaştıkları Ma‘rûz Medîne-i Üsküdar’da Kādıasker mahallesinde sâkine ve zâtı mu‘arrefe Habibe bt. Bektaş nâm hatun meclis-i şer‘-i hatîrde zevc-i sâbıkı Mustafa b. Halil mahzarında mezbûr Mustafa bundan akdem zevciyet beynimizde kāim iken eşyâ-i memlûkesinden iki yasdık ve bir minder ve bir tencere ve iki sahan ve bir yorgan ve bir maşrabasını bana hibe-i sahîha-i şer‘iye ile hibe ve temlik ve teslîm ben dahi ittihâb ve tesellüm ve kabz etmiş iken dört gün mukaddem beni tatlîk edip eşyâ-i mezkûre yedinde kalmağla taleb ederim deyü eylediği da‘vâsından bâ-tavassut-ı muslihîn meccânen fâriğa olup mezbûr Mustafa dahi cihet-i karzdan müdde‘âsı olan yedi aded İslâmbol nısfıyesine müte‘allika âmme-i de‘âvîden müdde‘iye-i mezbûrenin zimmetini kezâlik meccânen ibrâ ve ıskāt ve herbiri âharın ibrâsını ba‘de’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 15 min-Ca sene 1205