Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 416 Hüküm no: 431 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki el-Hâc Mustafa Ağa Vakfı mütevelliyesi olan kızı Fâtıma Hatun’un vekili el-Hâc Ali Ağa’yı azlettiği Hilâl-i sutûrda mezkûr husûsu mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Mustafa Efendi b. el-merhûm Yunus Efendi Mahmiye-i İstanbul’da Elvanzâde Mahallesi’nde sâkin sâbıkā Bostancılar kethüdâsı fahrü’l-a‘yân Mustafa Ağa b. Ali nâm kimesnenin menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde ashâb-ı hayrâtdan merhûm Haseki el-Hâc Mustafa Ağa nâm sâhibü’l-hayrın vakfına evlâdiyet ve meşrûtiyyet üzere bi’l-fi‘il mütevelliye olan sâhibü’l-hayrın sulbiye kebîre kızı Fâtıma Hatun’un üveği babası ve tarafından husûsu âti’l-beyâna vekîl olduğu zâtını ârifûn mezbûr Mustafa Ağa ve el-Hâc Mehmed Ağa b. Receb ve Mehmed Ağa b. Mustafa şehâdetleriyle sâbit ve sübût-ı vekâletine hükm-i şer‘î lâhık olan Ali Ağa b. Abdurrahman meclis-i ma‘kūd-ı mezkûrda müvekkile-i mûmâ-ileyhâ tarafından bin yüz kırk iki senesi Muharremi gurresinden bir sene tamamına değin umûr-ı tevliyet-i mezkûreyi rü’yet ve ikāmete ve vekîli olan bâ‘isü hâze’l-kitâb el-Hâc Ali Ağa mahzarında bi’l-vekâle takrîr-i kelâm ve bast-ı merâm edip mezbûr el-Hâc Ali Ağa’nın sene-i mezkûrede îrad ve masrûfu hesâb [ve] kitâb olundukda cemî‘ makbûzât ve masrûfâtı müvekkile-i mûmâ-ileyhânın makbûlü olup tevliyet-i mezkûre vekâletinden kendiyi ba‘de’l-azl ve’l-ihrâc ber-mûceb-i defter-i müfredât el-Hâc Ali Ağa’ya târih-i mezkûrede nukūd ve zimem teslîm olunan yirmi altı bin doksan guruşu yine zimem-i nâsda olmak üzere temessükâtını bana def‘ ve teslîm ben dahi ber-vech-i muharrer yedinden bi’l-vekâle ve ahz u kabz eyledim dedikde gıbbe’t-tasdîk-i şer‘î mezbûr el-Hâc Ali Ağa meclis-i mezkûrda vekîl-i mezbûr Ali Ağa yedinde mümzâ ve mahtûm defterim nâtık olduğu meblağdan noksan nesne zuhûr eder ise ben mâlımdan zâmin ve kefîlim dediğini mevlânâ-yı mezbûr mahallinde tahrîr ve ma‘an ba‘s olunan Çukadâr Mustafa b. Abdullah ve Muhzır Ya‘kub b. Abdullah meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: El-hâc Hasan Ağa b. Ali, Hüseyin Ağa b. Ahmed Bey Aydos, Mehmed Efendi b. Hüseyin hulefâ-yı mevkūfât, es-Seyyid Salih Efendi b. es-Seyyid Ali Hoca, Hasan sâkin-i Misivri, es-Seyyid Mustafa b. Mustafa, Mustafa Efendi b. İbrahim, Ali Bey b. ( ), Mustafa Ağa b. Ali, Mehmed Ağa b. Receb Akşehrî, Mehmed b. Abdullah.