Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 386 Hüküm no: 515 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci asıllı Fatma’nın Hüseyin b. Abdullah’ın kendisini kölelikten azat ettiğini ispat etmesiyle hürriyetine kavuştuğu Ma‘rûz Medîne-i Üsküdar’da Hayreddin Çavuş mahallesinde sâkine olup rıkk-ı sâbıkını mu‘terife ve kıbel-i şer‘-i şerîfden ber-vech-i âtî da‘vâya me’zûne olan işbu orta boylu açık kaşlı Zenciyyetü’l-asl Müslimetü’l-mille Fatıma bt. Abdullah meclis-i şer‘-i şerîf-i enverde rakīk[a] olmak üzere kendiye vâzı‘ü’l-yed olan Hüseyin b. Abdullah nâm kimesne tarafından ber-vech-i âtî vekîl olduğu Ömer b. İbrahim ve Hasan b. Ahmed nâm kimesneler şehâdetleriyle sâbit olan Ahmed b. Abdullah nâm kimesne muvâcehesinde ben müvekkil-i mezbûr el-Hâc Hüseyin’in câriye-i memlûkesi iken târih-i i‘lâmdan altı ay mukaddem mahalle-i mezbûrede vâki‘ menzilinde beni cemî‘ mâlından tahrîr ve i‘tâk ve kayd-ı rıkdan halâs ve harâir-i asliyât zümresine ilhâk edip hattâ mahalle-i mezbûrede vâki‘ kahve dükkânı derûnunda huzûr-ı Müslimînde beni i‘tâk ettiğini dahi ikrâr ve işhâd etmiş iken müvekkil-i mezbûr bana rakīka olmak üzere vaz‘-ı yed eder suâl olunup kasr-ı yed birle sebîlim tahliye olunmak matlûbumdur deyü da‘vâ ve vekîl-i mezbûr cevâbında fi’l-hakīka müdde‘iye-i mezbûre Fatıma müvekkilim mezbûrun câriye-i memlûkesi olup müvekkilim mezbûr ancak fevtimden âzâd ol deyü müdebbere etmiş idi deyü ber-vech-i muharrer i‘tâkını inkâr etmeğin müdde‘iye-i mezbûre mevlâsı müvekkil-i mezbûrun ber-minvâl-i muharrer kendiyi i‘tâk ve harâir-i asliyât zümresine ilhâk eylediğini mahalle-i mezbûre ahâlisinden İbrahim b. Hasan ve Ali Efendi b. Ahmed ve el-Hâc Abdullah b. Ömer ve es-Seyyid Mustafa b. Osman nâm kimesneler şehâdetleriyle vech-i şer‘î üzere isbât etmesin mûcebiyle müdde‘iye-i mezbûre Fātıma’nın ıtkına ba‘de’l-hükm sebîli tahliye olunduğu bi’l-iltimâs huzûr-ı âlîlerine i‘lâm olundu Fī 18 min-Ca sene 1205