Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 390 Hüküm no: 524 Orijinal metin no: [45b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin kayığının kaybolmasına sebep olan Salih b. Mehmed’in kayığın bedelini tazmin etmesi Ma‘rûz Medîne-i Üsküdar’da Küçükhamam kurbünde sâkin es-Seyyid Ali b. Hamza nâm kimesne medîne-i mezbûrede meclis-i şer‘-i hatîrde Salih b. Mehmed nâm kimesne mahzarında târih-i i‘lâmdan bir sene mukaddem emlâkimden otuz üç buçuk guruş kıymetli iki çifte ta‘bîr olunur kayığımı mezbûr Salih yedine ücret-i ma‘lûme kavliyle teslîm edip ol dahi üç gün mürûrunda zikr olunan kayığı iznimsiz medîne-i mezbûrede bir kayıkhâneye rabt lâkin hıfz üzere olmayıp te‘addîsinden nâşi zâyi‘ etmekle kıymeti olan meblağ-ı merkūm otuz üç buçuk guruşu mezbûr Salih’den taleb ederim deyü da‘vâ ve mezbûr Salih cevâbında ber-vech-i muharrer te‘addîsini ve ancak zikr olunan kayığın kıymeti yirmi guruş olduğunu ikrâr ziyâde on üç buçuk guruşunu inkâr etmeğin müdde‘î-i mezbûr ber-vech-i muharrer ziyâde müdde‘âsını beyâna ba‘de’l-havâle mezbûr Salih mertebe-i ikrârı olan yirmi guruşu müdde‘î-i mezbûra edâya bi-hükmi’d-damân şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 26 min-Ca sene 1205