Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 394 Hüküm no: 534 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Abdullah’ın boşandığı kocası Yusuf’ta alacağı ve eşyaları kaldığı iddiasıyla açtığı davayı ispat edemediği Ma‘rûz Medîne-i Üsküdar’da Mehmedpaşa mahallesinde sâkine mu‘arrefetü’z-zât Rabia bt. Abdullah nâm hatun meclis-i şer‘-i hatîrde zevc-i muhâlı‘ı Yusuf b. İbrahim nâm kimesne mahzarında mezbûr Yusuf ile bundan akdem zevciyet beynimizde kāim iken emlâkimden bir çift altın kuşak ve bir zerdeva kürk ve üç minder ve altı yasdık ve bir sevâyi entariyi emrimle âhara bey‘ edip semeni olan meblağ-ı merkūm iki yüz guruş ile bi-tarîki’l-âriye yedine teslîm eylediğim emlâkimden üç pirinç zarf ma‘a fincan ve bir çuka çakşırımı taleb ederim deyü da‘vâ mezbûr Yusuf cevâbında ancak zikr olunan zarf ve fincanı ikrâr ve mâ‘adâ eşyâ-i mezkûreyi semen-i merkūm iki yüz guruşa âhara bey‘ ve semen-i merkūmu yine emriyle mahalle-i mezbûrede vâki‘ mutasarrıfe olduğu menzilinin ta‘mîrâtına ve umûr-ı sâiresine harc ü sarf edip zikr olunan çuka çakşırı dahi bana hibe ve temlik etmiş idi deyü eylediği def‘ini müdde‘iye-i mezbûre ikrâr ü i‘tirâf etmeğin müdde‘iye-i mezbûre ber-vech-i muharrer zarf ve fincan da‘vâsını dahi beyândan ızhâr-ı acz birle bi’t-taleb mezbûr Yusuf gıbbe’t-tahlîfi’ş-şer‘î mûcebiyle müdde‘iye-i mezbûre da‘vâ-yı mezkûresiyle mezbûr Yusuf’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Ca sene 1205