Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 397 Hüküm no: 541 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kıbti Mehmed’in borcunu kefaletinden dolayı ödeyen Mahmud b. Mehmed’e paranın terekeden verilmesi Ma‘rûz Medîne-i Üsküdar’da Selami mahallesinde mütemekkin Mahmud b. Mehmed nâm Kıbtî meclis-i şer‘-i hatîrde yine mahalle-i mezbûrede mütemekkin iken bundan akdem vefât eden Kıbtî Mehmed b. Ali’nin hasran vârisi ve terekesine vaz‘-ı yedi mütehakkık olan kebîr oğlu Hamza nâm Kıbtî muvâcehesinde müteveffâ-yı mezbûr Mehmed’in hâl-i hayatında târih-i i‘lâmdan dört sene mukaddem medîne-i mezbûre muzâfâtından Şile nâhiyesinde sâkin İmâmoğlu Ahmed Ağa’ya bir re’s bârgir semeninden bâkī sekiz buçuk guruş deynine bi’l-emr ve’l-kabûl kefîl ve dâmin olup kable’l-edâ mezbûr Mehmed vefât edip ben kefâletime binâen deyn-i mezkûru mezbûr Ahmed Ağa’ya edâ etmemle hâlâ deyn-i merkūmu tereke-i vâfiyesinden bi’l-mürâca‘a taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını Mehmed b. Hasan ve Bostanî Ahmed b. Abdullah nâm kimesneler şehâdetleriyle bi’l-muvâcehe isbât etmeğin mûcebiyle meblağ-ı merkūm sekiz buçuk guruşu tereke-i müteveffâ-yı mezbûrdan müdde‘î-i merkūm Mahmud’a edâ ve teslîme merkūm Hamza’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 9 min-C sene 1205