Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 398 Hüküm no: 542 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Perapyon bt. Avanis’in kendisine intikal eden eşya hususunda açtığı tazminat davasında sulh olduğu Ma‘rûz Medîne-i Üsküdar’da Yenimahalle’de mütemekkine ve şahsı mu‘arrefe Perapyon bt. Avanis nâm Nasrâniye medîne-i mezbûrede mahfil-i bâbda meclis-i şer‘-i hatîrde hâletesi olup kezâlik şahsı mu‘arrefe Sogome bt. Haçador nâm Nasrâniye muvâcehesinde merkūme Sogome Nasrâniye bundan akdem müte‘âkiben hâlik olan ebeveynim Avanis ve Maryem’in terekeleri ma‘rifet-i şer‘le bey‘ olunduğu meclisde tarafımdan vekâleten benim için iştirâ eylediği eşyâdan semenleri kırk bir guruşa bâliğ olan eşyâ-i ma‘lûmeyi bana teslîm etmeyip yedinde kalmağla taleb ederim deyü eylediği da‘vâsından bâ-tavassut-ı muslihîn otuz iki buçuk guruş bedel mukābelesinde sulh olup ve bedel-i sulh-ı mezkûr otuz iki buçuk guruş bi-tarîki’l-havâle ahz ve istifâ ve ziyâde müdde‘âsı olan sekiz buçuk guruşa ve bi’l-cümle husûs-ı mezkûra müte‘allika âmme-i de‘âvîden mersûme Sogome Nasrâniyenin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-C sene 1205