Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 402 Hüküm no: 549 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naile bt. Seyyid Mehmed’in, boşandığı kocasından nafaka bedeli talebiyle açtığı davada sulh oldukları Ma‘rûz Medîne-i Üsküdar’da Kefçe mahallesinde sâkine ve zâtı mu‘arrefe Nâile bt. es-Seyyid Mehmed nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı es-Seyyid Süleyman b. Abdullah nâm kimesne mahzarında mezbûr es-Seyyid Süleyman târih-i i‘lâmdan iki sene mukaddem zevc-i dâhilim iken beni tatlîk ve mezbûrun firâşından hâsıla ve benden mütevellide sagīre kızım Şerife Nefise’yi bilâ-nafaka yanımda terk ve diyâr-ı âhara gitmekle ben dahi işbu yedimde olan bir kıt‘a nafaka hücceti mantûku üzere mezbûr es-Seyyid Süleyman üzerine kıbel-i şer‘den külle yevm sekiz para nafaka takdîr ve istidâneye izin olup sagīre-i mezbûreyi bi’l-istidâne on iki ay infâk etmekle hâlâ şühûr-ı mezkûrede müctemi‘a olan yetmiş iki guruş nafaka-i mukaddere-i müstedâneyi mezbûr es-Seyyid Süleyman’dan bi’l-muvâcehe taleb ederim deyü eylediği da‘vâsından bâ-tavassut-ı muslihîn on beş guruş bedel-i makbûz mukābelesinde mezbûr es-Seyyid Süleyman ile sulh olup ziyâde müdde‘âsı olan elli yedi guruşa müte‘allıka âmme-i de‘âvîden mezbûr es-Seyyid Süleyman’ın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-C sene 1205