Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 404 Hüküm no: 553 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Abdi Beşe’nin dükkânını yıktığı iddiasıyla kiracısı Berber Ahmed’e açtığı davada tarafların sulh oldukları Ma‘rûz Medîne-i Üsküdar’da Büyükhamam kurbünde sâkin Manav Abdi Beşe b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde müstecir Berber Ahmed b. Mehmed mahzarında merhûm Hüdâî es-Seyyid eş-Şeyh Mahmud Efendi vakfı musakkafâtından medîne-i mezbûrede Yeniçeşme’de vâki‘ bi’l-icâreteyn tasarrufumda olan bir bâb kahve dükkânımı mezbûr Ahmed fuzûlî hedm etmekle kemâ-fi’l-evvel binâsına tenbîh olunmak matlûbumdur deyü da‘vâ ol dahi cevâbında dükkân-ı mezkûr müdde‘î-i mezbûrun tasarrufunda olup ve ber-vech-i muharrer hedm eylediğini ikrâr lâkin derûnunda mevcûde âlât-ı lâzımesini gedik olmak üzere iştirâ etmiş idim dedikde müdde‘î-i mezbûr gedik olduğunu inkâr etmekle beynlerinde ba‘de vukū‘ı’l-münâza‘a bâ-tavassut-ı muslihîn müdde‘î-i mezbûr dükkân-ı mezkûrun icâresine onar para zammıyla târih-i i‘lâmdan beher şehr tamamında yüz onar paraya mezbûr Ahmed’e gedik olmak üzere izin ve îcâr ol dahi ba‘de’l-istîcâr ve’l-kabûl dükkân-ı mezkûru kemâ-fi’l-evvel binâ eylemek üzere ta‘ahhüd ve bu vechile kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 15 min-C sene 1205