Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 418 Hüküm no: 585 Orijinal metin no: [50a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın kendisine rehin bırakılan kıymetli eşyaların üvey kızı tarafından çalınıp Yahudi İlya v. Salamon’a verildiği hakkındaki iddiasını ispatlayamadığı Ma‘rûz; Medîne-i Üsküdar’da Davudpaşa mahallesinde sâkine ve zâtı mu‘arrefe Âişe bt. Mehmed nâm hatun meclis-i şer‘-i hatîrde İlya v. Salamon nâm Yahûdî muvâcehesinde gāibetü ani’l-meclis Fatıma nâm hatunun yirmi guruş deyni mukābelesinde bana rehin vaz‘ ve teslîm eylediği otuz guruş kıymetli üç aded elmas taşlı bir sîm iğne ve bir tesbîhi üvey kızım hâzıratü bi’l-meclis Emine nâm sagīre hufyeten sandığımdan ahz ve yedinde iken on beş gün mukaddem İlya Yahûdî sagīre-i mezbûreyi aldayup yedinden bir paraya iştirâ ve kabz etmekle taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını beyâna kādire olamayıp talebiyle merkūm İlya Yahûdî gıbbe’t-tahlîfi’ş-şer‘î mûcebiyle müdde‘iye-i mezbûre da‘vâ-yı mezkûresiyle merkūm İlya Yahûdî’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-Receb sene 1205