Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 420 Hüküm no: 589 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ali ile Mustafa arasındaki alacak verecek davasının sonuçlandırılamadığı Ma‘rûz; Mahmiye-i İslâmbol’da Sultan Bâyezid kurbünde sâkin Hüseyin Ağa b. Ali nâm kimesne medîne-i Üsküdar’da meclis-i şer‘-i hatîrde el-Hâc Mustafa mahzarında târih-i i‘lâmdan dört sene mukaddem memâlik-i Nemçe’de Şebeş muhârebesinde istirkāk ile mâlik olduğum üç re’s câriyelerimi âhara bey‘ içün mezbûr el-Hâc Mustafa yedine teslîm etmemle ol dahi zikr olunan câriyeleri sekiz yüz elli guruşa ba‘de’l-bey‘ beş yüz elli guruşunu yedinden ahz ü kabz etmemle bâkī üç yüz guruşu taleb ederim deyü da‘vâ, mezbûr el-Hâc Mustafa cihet-i mezkûreden ol-mikdâr deyni bâkī kaldığını ikrâr lâkin müdde‘î-i mezbûr Hüseyin Ağa gāib ani’l-meclis karındaşı Osman nâm kimesneyi tevkîl ve mektûb ile bana irsâl ben dahi mektûbunda tahrîr eylediği vech üzere mezbûr Hüseyin Ağa yedine bi-tarîki’l-vedî‘a teslîm eylediğim bir re’s atımı şirâya tâlib olmağla müdde‘âsı olan meblağ-ı merkūm üç yüz guruşun yüz elli guruşunu zikr olunan at semenine bâkī yüz elli guruşu dahi cevârî-i mezkûrelerin harc-ı râh ve mesârif-i sâirelerine mahsûb ve takas eylediğimde vekîl-i mezbûr Osman dahi mukāssa ve kabûl edip ol-vechile zimmetim berî olmuş idi deyü ba‘de’d-da‘vâ ve’l-inkâr mezbûr el-Hâc Mustafa ber-vech-i muharrer eylediği def‘ini beyâna havâle olunup henüz da‘vâlarına faysal verilmediği bi’l-iltimâs huzûr-ı âlîlerine i‘lâm olundu. Fî 28 min-C sene 1205