Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 421 Hüküm no: 591 Orijinal metin no: [50b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in Abraham v. Yorgi’ye olan borcunu ödediği Ma‘rûz; Medîne-i Üsküdar’da Atpazarı’nda handa mütemekkin dülger tâifesinden Abraham v. Yorgi nâm zimmî meclis-i şer‘-i hatîrde es-Seyyid Hüseyin b. Mehmed nâm kimesne mahzarında târih-i i‘lâmdan iki ay mukaddem mezbûr es-Seyyid Hüseyin’in medîne-i mezbûrede Kefçe mahallesinde vâki‘ menzilinde dülgerlik ücretinden zimmetinde müctemi‘a olan seksen sekiz guruş beş para ücretimin elli bir guruş beş parasını yedinden ahz ü kabz ve otuz yedi guruşu zimmetinde bâkī kalıp hattâ bu esnâda hesâbımızı rü’yet eylediğimizde ücret-i mezkûreden bâkī otuz yedi guruş bana deyni olduğunu ikrâr dahi etmekle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını beyâna kādir olamayıp talebiyle mezbûr es-Seyyid Hüseyin gıbbe’t-tahlîfi’ş-şer‘î mûcebiyle müdde‘î-i merkūm Abraham zimmî da‘vâ-yı mezkûresiyle mezbûr es-Seyyid Hüseyin’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 15 min-Receb sene 1205