Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 422 Hüküm no: 593 Orijinal metin no: [50b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın Kadıköy’deki kayıkhanesine ait gediğin satışıyla ilgili Ahmed b. Hüseyin’in açtığı davanın geçerli olmadığı Ma‘rûz; Mahmiye-i İslâmbol’da Çatladıkapı İskelesi’nde Kayıkcı sâhib-i arzuhâl Ahmed b. Hüseyin nâm kimesne meclis-i şer‘-i hatîrde Medîne-i Üsküdar’a tâbi‘ Kādı karyesi sâkinelerinden arzuhâlde ismi mezkûre Fatıma Hanım bt. Abdullah Sadık Ağa tarafından ber-vech-i âtî vekîli olduğunu zâtını ârifân es-Seyyid Mustafa b. Hasan ve el-Hâc Ahmed b. Hüseyin nâm kimesneler şehâdetleriyle sâbit olan zevci Abdulkadir Bey b. Osman mahzarında müvekkile-i mezbûrenin bundan akdem iskele-i mezkûre kurbünde vâki‘ kayıkhânesi olup ben dahi târih-i i‘lâmdan üç sene mukaddem kayıkhâne-i mezkûreye bir aded kayığımı çekmek üzere beher şehr kırk para ücret ile müsteciri olup târih-i merkūmda kayığımı âhara bey‘ ve ben sefer-i hümâyûna gidip lâkin kayıkhâne-i mezkûrede kayık çektiğim mahalle kayıkcı esnâfı beynlerinde gedik i‘tibâr olunup bey‘ u şirâ olunagelmekle ben gedik ta‘bîr olunan mahâlli gāib ani’l-meclis Deli Mehmed nâm kimesneden doksan sekiz guruşa iştirâ ve def‘-i semen etdikden sonra müvekkile-i mezbûre mahâll-i mezkûru kırk guruş bedel mukābelesinde fuzûlî âhara bey‘ etmekle hâlâ zikr olunan kayıkhâne gediğinin gāib-i mezbûra def‘ eylediğim kıymeti olan doksan sekiz guruşu müvekkile-i mezbûreden tasaddî eylediği da‘vâsı meşrû‘a olmayıp bî-vech mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 17 min-Receb sene 1205