Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 425 Hüküm no: 601 Orijinal metin no: [51a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar Ali Kalfa’nın sattığı evi geri alma talebinin hukusuz olduğu Ma‘rûz; Medîne-i Üsküdar’da Vâlide-i Atik mahallesinde sâkin Neccâr Ali Kalfa b. İsmail nâm kimesne mahfil-i bâbda meclis-i şer‘-i hatîrde Kahveci Ali b. Ahmed mahzarında târih-i i‘lâmdan üç gün mukaddem Tenbel el-Hâc Mehmed mahallesinde vâki‘ ma‘lûmü’l-hudûd ve’l-müştemilât bir bâb mülk menzilimin kıymeti beş yüz guruş olup işbu hâzır bi’l-meclis Münâdî Osman’ın ziyâdeye tâlibi zuhûr etmedi dediğine binâen ben dahi mezbûr Kahveci Ali’ye zarûretim hasebiyle dört yüz yirmi guruşa bey‘ ve teslîm eylediğimde ol dahi iştirâ ve kabûl eyledikden sonra semeni olan meblağ-ı merkūm dört yüz yirmi guruşun iki yüz yirmi guruşunu yedinden ahz ve bâkī iki yüz guruşunu bir ay tamamında bana edâ etmek üzere te’cil etmişdim lâkin menzil-i mezkûrun ziyâde bahâ ile âhar müşterîsi zuhûr edip bey‘-i mezkûr gabn-ı fâhiş ile olmağla makbûzum olan iki yüz yirmi guruşu redd ve menzil-i mezkûru istirdâd ederim deyü eylediği da‘vâsı meşrû‘a olmamağla müdde‘î-i mezbûr da‘vâ-yı mezkûresiyle mezbûr Kahveci Ali bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 29 min-Receb sene 1205