Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 426 Hüküm no: 603 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehîden vefat eden İbrahim’in tasarrufunda bulunan tımarın oğlullarına intikali Ma‘rûz; Medîne-i Üsküdar’da Ahmed Çelebi mahallesi sükkânından olup vilâyet-i Anadolu’da Saruhan sancağında Gördek nâhiyesinde Mato? nâm karye ve gayrîden yedi bin beş yüz akçe tımara bâ-berât-ı âlî-şân mutasarrıf olan Paşa demekle arîf es-Seyyid İbrahim v. Müteferrika es-Seyyid Mehmed işbu sene-i mübârekede İsmail Muhârebesi’nde bi-emrillâhi te‘âlâ şehîden fevt olup tımar-ı mezbûr hâzırân bi’l-meclis takrîben on yaşında olan sulbî oğlu es-Seyyid Ahmed ve yedi yaşında olan âhar sulbî oğlu es-Seyyid Hasan’a kānûn üzere intikāl etmekle mezbûrân es-Seyyid Ahmed ve es-Seyyid Hasan müteveffâ-yı mezbûrun sahîhan sulbî oğulları olduğu mahallesi ahâlisinden vukūf-ı tammı olan bî-garaz kimesnelerden istihbâr olunup sagīrân-ı mezbûrânın anaları ve vasîleri Emine bt. Abdullah nâm hatunun istid‘âsına binâen mahalle-i mezbûre ahâlisinden, eşrâf-ı kuzâtdan Ahmed Efendi b. Abdurrahman ve Selim Ağa b. Süleyman ve Molla Halil b. Abdullah ve Ali Efendi b. Salih ve Ahmed Efendi b. Mehmed ve Hafız Mehmed b. Ali ve es-Seyyid el-Hâc Mustafa b. Mehmed ve Molla Ali b. Abdullah ve Mehmed Beşe b. Hüseyin ve el-Hâc Ali Ağa b. Mehmed nâm kimesneler meclis-i şer‘a hâzırûn olup istihbâr olunduklarında fi’l-hakīka tımar-ı mezkûrun bâ-berât-ı âlî-şân mutasarrıfı olan müteveffâ-yı mezbûr es-Seyyid İbrahim v. Müteferrika es-Seyyid Mehmed’in işbu mezbûrân es-Seyyid Ahmed ve es-Seyyid Hasan sahîhan sulbî oğulları olmağla biz bu husûsa bu vech üzere şâhidleriz ve inde’l-hasm şehâdet dahi ederiz deyü her biri bi’ş-şöhret ve’t-tevâtür alâ-tarîki’ş-şehâde haber verdikleri ba‘de’t-tescîl bi’l-iltimâs huzûr-ı âlîlerine i‘lâm olundu. Fî 29 min-Receb sene 1205