Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 427 Hüküm no: 604 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakıyeci Cafer mahallesindeki harab mescidin tamir edilip mescide ait vakfın muhâsebesinin görülmesi Ma‘rûz; Medîne-i Üsküdar’da Arakıyeci el-Hâc Cafer mahallesi ahâlisinden ashâb-ı arzuhâl İmâm Mehmed Efendi b. Osman ve el-Hâc Mehmed Emin Ağa b. İmadeddin ve İbrahim b. Ömer ve el-Hâc Ömer b. Osman ve el-Hâc Mustafa b. Hüseyin ve Mehmed Beşe b. Hüseyin ve Yakub b. Salih ve Mustafa b. Mehmed ve es-Seyyid Hasan b. İsmail ve Mustafa b. Ali ve diğer Mustafa b. Mehmed nâm kimesneler meclis-i şer‘-i [hatîrde] mahalle-i mezbûre mescid-i şerîfi vakfının mütevellîsi arzuhâlde ismi mezkûr es-Seyyid Mehmed Salih Efendi b. Mehmed nâm kimesne tarafından ber-vech-i âtî vekîli karındaşı es-Seyyid Abdurrahman Efendi mahzarında mahalle-i mezbûrede vâki‘ müvekkil-i mezbûr es-Seyyid Mehmed Salih Efendi’nin mütevellîsi olduğu câmi‘-i şerîf harâb ve edâ-yı salât mümkün olmayıp ve mütevellî-i mezbûrun istirbâh eylediği nukūd-ı mevkūfe dahi ma‘lûmumuz olmayıp yirmi seneden beri muhâsebesi rü’yet olunmamağla mütevellî-i mezbûrun muhâsebesi rü’yet ve câmi‘-i mezkûr ta‘mîr olunmak matlûbumuzdur deyü teşekkî ve vekîl-i mezbûr cevâbında fi’l-hakīka câmi‘-i mezkûr harâb olmağla asâleten ve vekâleten bi’r-rızâ kendi mâlımızdan câmi‘-i mezkûr[u] ta‘mîr ve tekmîl eylediğimizde vakf-ı mezbûrun muhâsebesini dahi ahâli-i mezbûre muvâcehesinde rü’yet ederim deyü ta‘ahhüd eyledikde ahâli-i mezbûre dahi bu vechile râzılar olup kat‘-ı muhâsama eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 17 min-B sene 1205