Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 426 Hüküm no: 440 Orijinal metin no: [102b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed ile eşi Hasan b. Ahmed’in muhala‘a yoluyla boşandıkları Mahmiye-i İstanbul’da İbrahimçavuş Mahallesi sâkinelerinden olup zâtı mahalle-i mezbûre imâmı Hasan Efendi b. Mehmed ve Ahmed b. Mustafa nâm kimesneler ta‘rîfleriyle mu‘arrefe olan Hadice bt. Mehmed nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb Hasan b. Ahmed <> nâm kimesne mahzarında ikrâr ve takrîr-i kelâm edip mezbûr Hasan zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve mezbûr Hasan’a bundan akdem medfû‘um olan yirmi yedi guruş bedel-i hul‘ olmak üzere meûnet-i süknâm dahi kendi üzerime olmak üzere zevcim mezbûr Hasan ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: İmâm Hasan Efendi b. Mehmed, Ahmed Beşe b. Mustafa, Kādızâde İbrahim Çelebi b. Abdullah, Abdullah Çelebi b. Mustafa.