Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 426 Hüküm no: 441 Orijinal metin no: [102b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şark seferi için Aşçı esnafından toplanıp artan paranın eski kethüda Mustafa Çelebi tarafından yeni kethüda Molla Osman’a teslim edildiği Aşçı hırfetinin bâ-berât-ı âlîşân bi’l-fi‘il kethüdâları olan Molla Osman b. Mehmed nâm kimesne meclis-i şer‘-i şerîf-i enverde hırfet-i mezbûrenin sâbıkā kethüdâları olan bâ‘isü hâze’l-kitâb es-Seyyid Mustafa Çelebi b. Ahmed mahzarında takrîr-i kelâm ve bast-ı merâm edip bundan akdem şark cânibine iktizâ eden sefer-i hümâyûn mesârifi için mezbûr es-Seyyid Mustafa kethüdâ bulunmağla hırfet-i mezkûre ve yamaklarından cem‘ ve tahsîl ve ahz u kabz eylediği bin üç yüz doksan dört guruşdan ber-mûceb-i defter cümle muvâcehesinde hesâbı görüldükde ba‘de’l-ihrâci’l-mesârif mezbûr es-Seyyid Mustafa Çelebi yedinde bâkī kalan dört yüz yetmiş beş guruşu hâlâ ben hırfet-i mezbûre kethüdâsı olmamla mezbûr es-Seyyid Mustafa Çelebi meblağ-ı bâkī-i mezbûr dört yüz yetmiş beş guruşu bana def‘ ve teslîm ben dahi yedinden bi’l-emâne ahz u kabz eyledim fîmâ-ba‘d meblağ-ı bâkī-i mezbûrdan mezbûr es-Seyyid Mustafa Çelebi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Du‘âcı Molla İbrahim b. Mustafa, Urfalı Mustafa, Abdullah b. Mustafa, Mustafa b. Abdullah, Ahmed b. Hasan, Kasım el-muhzır.