Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 435 Hüküm no: 621 Orijinal metin no: [52b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Osman’ın Hasan b. Ahmed’e olan borcunu ödediği Ma‘rûz; Medîne-i Üsküdar’da Büyük İskele kayıkcılarından Hasan b. Ahmed nâm kimesne tarafından ber-vech-i âtî taleb ve da‘vâ ve sulh ve ibrâya vekîl olduğu İbrahim b. Mustafa ve Hüseyin b. Hasan nâm kimesneler şehâdetleriyle sâbit olan Osman b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde Ahmed b. Osman nâm kimesne mahzarında müvekkilim mezbûr Hasan bundan akdem mezbûr Ahmed’in bağında beher yevm yirmişer para ücret kavliyle doksan gün tımar hizmetini rü’yet edip eyyâm-ı mezkûrede kırk beş guruş ücreti müctemi‘a olmağla meblağ-ı merkūmun on beş guruşunu yedinden ahz ü kabz ve otuz guruşu zimmetinde bâkī kalmağla bi’l-vekâle taleb ederim deyü eylediği da‘vâsından bâ-tavassut-ı muslihîn on beş guruş bedel mukābelesinde mezbûr Ahmed ile bi’l-vekâle sulh olup ziyâde müdde‘âsı olan on beş guruşa müte‘allika âmme-i de‘âvîden mezbûr Ahmed’in zimmetini bi’l-vekâle ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-Ş sene 1205