Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 427 Hüküm no: 442 Orijinal metin no: [102b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Artin’in alacağını oğlu vasıtasıyka tahsil ettiği Bâ-imzâ-i hazret-i efendi. Mahmiye-i İstanbul’da Alipaşa-yı Atîk Mahallesi’nde sâkin sarraf tâifesinden Ohannes v. Artin nâm Ermeni meclis-i şer‘-i şerîf-i enverde Mehter Yusuf Ağa yeğeni izzetlü Mehmed Ağa çukadârlarından bâ‘isü hâze’l-kitâb Ebûbekir Ağa b. İbrahim mahzarında ikrâr ve takrîr-i kelâm edip babam mezbûr Artin diyâr-ı âharda olmağla Duhânî işbu hâzır bi’l-meclis Hüseyin Çelebi’ye cihet-i karz-ı şer‘îden zimmetinde dört yüz guruş deyni olmağın deyn-i mezkûra mahsûben yüz dirhem hurda altın mezbûr Çukadâr Ebûbekir Ağa yediyle bana îsâl ve teslîm ben dahi ber-vech-i muharrer yedinden ahz u kabz eyledim min-ba‘d zikrolunan yüz dirhem hurda altından mezbûr Çukadâr Ebûbekir Ağa yedinde ve zimmetinde bir nesne bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Ali Çelebi b. Mustafa, Mehmed Çelebi b. Abdullah, Ahmed b. Hasan, Mustafa Çelebi b. Abdullah, Mehmed Ali Efendi b. Hasan, Mustafa b. Abdülaziz, Osman b. Mustafa.