Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 437 Hüküm no: 626 Orijinal metin no: [53a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha Hanım ile Seyyid Mehmed’in aralarındaki darb ve suikast davasında sulh oldukları Ma‘rûz; Medîne-i Üsküdar’da Solak Sinan mahallesinde sâkine ve zâtı mu‘arrefe Zeliha bt. Osman nâm hatun medîne-i mezbûrede mahfil-i bâbda meclis-i şer‘-i hatîrde es-Seyyid Mehmed b. Ahmed nâm kimesne mahzarında mezbûr es-Seyyid Mehmed târih-i i‘lâm günü bi-gayrı hakkın menzilim kapısını kırıp menzilime duhûl ve yumruk ile ağzıma darb ve işbu mu‘âyene olunan bir aded azı dişimi ihrâc ve menzil-i mezkûrda kızım Ümmügülsüm’e sû-i kasd etmekle mûcib-i şer‘îsini taleb ederim deyü da‘vâ ve beynlerinde münâza‘ât-ı kesîre vâkı‘a olmuş idi el-hâletü hâzihî beynlerinde muslihûn tavassut edip müdde‘iye-i mezbûre eylediği da‘vâ-yı mezkûresinden fâriğa olup zikr olunan dişine ve diyetine ve bi’l-cümle husûs-ı mezkûra müte‘allika âmme-i de‘âvîden mezbûr es-Seyyid Mehmed’in zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-Ş sene 1205