Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 438 Hüküm no: 628 Orijinal metin no: [53a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in kardeşine sattığı yarım hisse evi geri alma talebinin hukuksuz bulunduğu Ma‘rûz; Medîne-i Üsküdar’da Salacak mahallesinde sâkin es-Seyyid Ahmed b. Mehmed medîne-i mezbûrede mahfil-i bâbda meclis-i şer‘-i hatîrde li-ebeveyn karındaşı es-Seyyid Mehmed mahzarında târih-i i‘lâmdan on üç ay mukaddem mahalle-i mezbûrede vâki‘ ma‘lûmü’l-hudûd ve’l-müştemilât bir bâb mülk menzilimin nısf hisse-i şâyi‘asını bâ-hüccet yüz guruş semen-i makbûza deyü karındaşım mezbûra bey‘ ü temlik ve teslîm etmiş idim lâkin ben meblağ-ı merkūm yüz guruşu karındaşım mezbûrun yedinden ahz ü kabz etmediğimden mâ‘adâ bey‘-i mezbûr dahi yine mahalle-i mezbûrede kâin münâsafeten mutasarrıf olduğumuz câmeşûycı dükkânında beni mâ‘an ölünce câmeşûycılık etdirmek şartıyla meşrût olup fesâdına binâen menzil-i mezkûrda olan nısf hisse-i şâyi‘amı bana redd ü teslîme mezbûr es-Seyyid Mehmed’de tenbîh olunmak matlûbumdur deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâta kādir olamayıp tahlîfe dahi tâlib olmamağla mûcebiyle müdde‘î-i mezbûr da‘vâ-yı mezkûresiyle karındaşı mezbûr es-Seyyid Mehmed’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 12 min-Ş sene 1205